Këshilltari i Presidentit, Tedi Blushi ka reaguar pas rrëzimit të dy dekreteve të Presidentit Ilir Meta.

Blushi i është përgjigjur njëherazi dhe ministres Spiropali, e cila akuzoi Metën si pjesë të një skenari për destabilizimin e Shqipërisë.

Sipas zëdhënësi të presidentit, duhet ndjerë keqardhje për të çmendurën, e cila pasi u përdor për të nxjerrë me këpucë të kuqe doganat, po ofrohet për t'i nxjerrë dritat e kuqe edhe ekonomisë kombëtare.

Statusi i plotë:

Të çmendurit, për t'i shpëtuar shiut, futen në pellg. Njësoj si e çmendura E., e cila u zhyt edhe sot në llumin e shpifjes, për t'i shpëtuar shiut të së vërtetës, duke lëshuar tymuesen e radhës, me shpresën se do largohet sadopak vëmendja nga keqperdorimi i Kuvendit për mbulimin e PPP-ve të paligjshme që u miratuan sot:

1. Ligji nr.51/2019 dhe Kontrata Koncesionare për segmentin rrugor "Porti i Jahteve – By-pass Orikum - Dukat (Ura e Shën Elizës)”, sipas ofertës vlera totale 70 119 755 euro, dhe pas negocimit dhe dakordësimit ndërmjet palëve vlera do të jetë 67 359 926 euro plus TVSH-në.

Çmimi i dakordësuar midis palëve është 16,784,906 Euro, më i lartë se kostoja e projektit e publikuar nga vet autoriteti kontraktor për konkurim.

2. Ligji nr. 52/2019 dhe Kontrata Koncesionare për ndërtimin e segmentit rrugor Milot-Balldren, ashtu si dhe kontrata Orikum-Dukat janë propozuar, hartuar nënshkruar dhe miratuar në kundërshtim me parimin e shtetit të së drejtës; në kundërshtim të hapur me interesin publik dhe në shkelje të parimit të konkurencës së lirë dhe të barazisë përpara ligjit.

Për rrugën Milot Balldren Çmimi i dakordësuar midis palëve në vlerën prej 213 665 040 Euro plus TVSH është 52,165,040 Euro, më i lartë se kostoja e projektit e publikuar nga vet autoriteti kontraktor për konkurim.

Për t’i dhënë një mbrojtje këtij procesi të paligjshëm, dhe për të shmangur çdo përgjegjësi nesër qeveria ka miratuar një rregull të ri, për t’ia kaluar përgjegjësinë Kuvendit, me qëllim aministimin e gjithë procesit të zhvilluar në paligjshmëri të plotë.

Keqardhje për të çmendurën E., e cila pasi u përdor për të nxjerrë me këpucë të kuqe doganat, po ofrohet për t'i nxjerrë dritat e kuqe edhe ekonomisë kombëtare.