Nga të dhënat e NASA-s rezulton se prilli i 2016-s ishte më i nxehti i regjistruar ndonjëherë dhe muaji i shtatë radhazi që theu rekordet e temperaturave globale.

“Prilli i këtij viti, tejkaloi rekordin e vendosur në të njëjtin muaj të një viti më parë, me diferencën më të madhe të shënuar ndonjëherë”, thuhet në shënimet e NASA-s.

Të dhënat tregojnë se temperatura globale e tokës dhe detit ishte 1.11 gradë më e lartë në muajin prill se sa temperatura mesatare e prillit gjatë periudhës nga viti 1951 deri ne 1980.

Sipas medieve ndërkombëtare, shpërthimi i ajrit të nxehtë rreth globit i është faturuar fenomenit “El Nino” i cili sjell lëvizjen e ujërave të ngrohta rreth Paqësorit. Por ky i këtij viti nuk ka qenë “El Nino” më i madh i regjistruar ndonjëherë dhe hovi i temperaturave po ndodh nën sfondin e ngrohjes së shpejtë globale.

Sipas shkencëtarëve, temperaturat rekord po shkaktonin kaos në ekosistemet botërore, me pasoja të rëndë tek barriera koralore në Australi.