Prokuroria për Krime të Rënda ka reaguar pas vendimit të dhënë një ditë më parë nga gjykata ndaj ish-ministrit të Brendshëm, Saimir Tahiri.

Prokuroria deklaron se do të apelojë vendimin si një detyrim ligjor. Pas një seance maratonë, Gjykata e Krimeve të Rënda gjeti fajtor ish-ministrin e Brendshëm Saimir Tahirin vetëm për një nga tre akuzat e ngritura nga organi i akuzës, atë për shpërdorim detyre.
Prokuroria kërkoi javën e shkuar dënimin prej 12 vitesh burgim, duke e akuzuar ish-ministrin për të paktën tre vepra të rënda: Trafik i narkotikëve kryer në bashkëpunim në formën e grupit të struktuar kriminal; Pjesmarrje në grup të strukturuar kriminal dhe kryerja e veprës në grup të strukturuar kriminal. Por gjykata i rrëzoi ato, duke vlerësuar se nuk kishte prova që të mbështesnin këto akuza, por se megjithatë, ishin sipas saj të mjaftueshme për ta dënuar zotin Tahiri për shpërdorim detyre.