Janë lënë të lirë 5 protestuesit e Unazës së Re. Ata u ndaluan nga forcat “Shqiponja” menjëherë pas mbylljes së ditës së 28 të protestës në zonën e Astirit. Në mbështetje të tyre në polici shkoi deputeti i PD, Klevis Balliu.

Në Komisariatin e Policisë nr.6 ishin shoqëruar shtetasit Gentian Gjoni, Altin Cejku, ndërsa në Komisariatin e Policisë nr.3, Shkëlzen Sadikaj, Dritan Cejku dhe Adriatik Cejku.

Menjëherë pas ndalimit të tyre, portestuesit e tjerë u mblodhën pranë ambiente të Komisariatit nr.3 dhe nr.6, ku u shprehën se do të prisnin lirimin e 5 të ndaluarve.

Në një prononcim për mediat, njëra prej banoreve të zonës e pranishme në momentin e shoqërimit të banorëve, u shpreh se policia ka ushtruar dhunë ndaj tyre teksa ata po përpiqeshin që të ndalonin shoqërimin në polici të protestuesve.