Ose e kundërta: ai duket shumë më tërheqës sesa ajo. Këto ndryshime mes partnerëve, që ndonjëherë ngjallin zili te ata që do donin të ishin në vendin e më pak të bukurve, paskan një shpjegim shkencor. Një rol kyç në lindjen e dëshirës ka konteksti në të cilin ndodh njohja mes tyre. “Disa rrethana u lejojnë njerëzve të krijojnë përshtypje të ndryshme mbi tjetrin. Në këtë rast, standardet e paracaktuara nuk kanë më vlerë dhe tjetri vlerësohet nga një pikëpamje krejt e ndryshme”, shpjegojnë studiuesit.

Washington Post, në një shkrim me titullin “Arsyeja e vërtetë pse njerëzit përfundojnë me partnerë që janë shumë më tërheqës”, ka sjellë një varg studimesh mbi këtë temë. “Kur bëhet fjalë për tërheqje, studiuesit mbështesin gjithmonë tezën e “tregut”: në një mjedis ku konkurrohet për partnerin më të mirë, përfundon duke zgjedhur gjithmonë dikë me të njëjtat karakteristika, por, kur njerëzit takohen herën e parë, ndoshta sepse janë miq të miqve ose shkojnë në një shkollë, thithin informacione që ndikojnë që në fillim, perceptimin e tjetrit dhe mund të rrisin tërheqjen ndaj tij. Kështu formohet një mendim për partnerin, që është i ndryshëm nga ai i të tjerëve”, shkruhet në studim.

Një studim, i publikuar në revistën “Psychological Science” I drejtuar nga shkencëtarët e University of Texas dhe Northwestern University, ka përfshirë 167 çifte heteroseksuale: çdo çift është pyetur prej sa kohësh e njeh partnerin dhe sa kohë ka kaluar nga njohja në takimin e parë si çift. Nga analizimi i të dhënave është kuptuar që ata që ishin njohur nga shkolla ose në rrethe familjare, që kishin lënë të kalonte shumë kohë, edhe nëntë muaj, para se të takoheshin si çift, duke iu lejuar emocioneve të saj dhe mendjes së tij, të krijonin një ide të saktë për tjetrin, prireshin ta gjykonin partnerin në mënyrë krejt personale dhe pak objektive. Këto rezultuan të ishin edhe çiftet më pak “korrespondues” në pamjen e jashtme, ku dallimet ishin më të dukshme.

Sipas të dhënave të Priceonomics, megjithatë, ky lloj marrëdhëniesh është gjithmonë e më i rrallë. Njerëzit tani priren të njihen duke përdorur gjithmonë e më pak ndërmjetësinë e miqve dhe të afërmëve, takohen gjithmonë e më pak në shtëpi apo në kishë dhe nuk kanë mundësi të mësojnë ndonjë “sekret” më shumë për personin që po njohin, asgjë që të zgjojë kureshtjen e tyre. Njohjet ndodhin gjithmonë e më shpesh në faqet e njohjeve apo lokale, ku pamja është kriteri i vetëm që vlerësohet.