Mbrëmjen e 18 janarit 2016, një grup policësh u futën pa trokitur në dy dhoma të një hoteli në Rrugën e Elbasanit në Tiranë. Qëllimi i tyre ishte arrestimi i dy shtetasve turq, që kishin bujtur në hotel të shoqëruar nga dy prostituta 20 dhe 23 vjeçe. Kjo ndërhyrje e beftë, që gjeti të zhveshur një prej çifteve, ishte finalizimi i një hetimi për një rrjet të shfrytëzimit të prostitucionit të shtrenjtë në kryeqytet.

Sipas Prokurorisë së Tiranës, ishte 29-vjeçarja S. N., ajo që “menaxhonte” tri prostituta, njëra prej të cilave minorene. Ajo i ka strehuar në banesën e saj në periferinë e Tiranës tri vajzat dhe i ndërmjetësonte me persona të ndryshëm për prostitucion. Për gjetjen e klientëve, ajo ka bashkëpunuar edhe me disa taksistë, një prej të cilëve edhe punonjës policie, të cilët përfitonin 20 për qind të fitimit në këto raste.

Ditët e fundit, Gjykata e Tiranës përfundoi gjykimin e kësaj dosjeje, duke i fajësuar pesë të pandehurit. Vendimi i gjykatës, zbardh dhjetëra përgjime telefonatash mes të pandehurve në lidhje me pazaret e shërbimeve të seksit në Tiranë. Sipas Gjykatës, gjatë hetimit e pandehura Silvana N. ka deklaruar se ushtron prostitucion si mënyrën e përfitimit të të ardhurave të saj.

Në ushtrimin e kësaj veprimtarie ajo ka bashkëpunuar me disa shtetase të tjera, të cilat i ndërmjetësonte me klientë të ndryshëm. Në këtë veprimtari është ndihmuar nga shtetas që ushtrojnë shërbimin taksi si E. Y, i cili është njëkohësisht edhe punonjës policie, si dhe të pandehurin E.K. Në përfundim të gjykimit të dosjes, togat e zeza të Gjykatës së Tiranës dënuan me nga 4 muaj burg për akuzën e “prostitucionit” dy shtetasit turg, M.O. dhe S.K.

Për të njëjtën akuzë, të pandehurat Xh. D. dhe A.I, janë dënuar me nga 10 muaj burg. Ndërsa e pandehura S. N. është dënuar me 4 vjet e 8 muaj për akuzën e “shfrytëzimit të prostitucionit”. Përfundimisht, gjykata e ka lënë atë në liri me kusht për një periudhë 3-vjeçare. Tre taksistët, E. K., E.Y. dhe F. A., po gjykohen për “shfrytëzim prostitucioni” dhe “moskallëzim krimi” në një proces të veçuar.

PËRGJIMET

Nga procesverbalet e transkriptimit rezultojnë këtë të dhëna: Në datë 07.01.2016, S. ka biseda me interes me nr.06…443, me të cilin bën pazar për prostitucion. Nga transkriptet e bisedave telefonike të datës 08.01.2016, në komunikimet e bëra me katër numra ka biseda me përmbajtje pazaresh dhe nënkuptim për të kryer prostitucion.

Edhe ne datën 09.01.2016, ora 00:17, S.  ka komunikim me shtetasin E. Y, punonjës policie, të cilin e pyet lidhur me marrjen e disa femrave, si dhe i lë porosi për të marre një telefon e ta çojë diku.

Në datë 11.01.2016, ora 14:16, Silvana dërgon SMS në nr.06…340, ku i thotë “1 orë 5 të tonat”. Në orën 20:30, S. është kontaktuar nga nr.06…008, i cili i tregon se ku të shkojë ajo, te tuneli nga pas kafe “Europës”.

SEKS TRESH TE “SHEFI”

Në datë 12.01.2016, ora 01:04, deri në 04:43, ajo komunikon me nr.06…431 që i përket Xh.D., ku S.  e nxit të shkojnë bashkë te një person që i thonë “shefi”, se paguan mirë. Sipas Silvanës, te ky person i panjohur kanë qenë me Xh.  dhe një natë tjetër së bashku me një shoqen e tyre e quajtur Ana.

“100 MIJË LEKË ORA”

Nga transkripti i nr.06…205 në datë 12.01.2016, rezulton se S.  ka marrë SMS nga ora 02:40, nga numri 06…111, i cili i thotë se do të shkojnë bashkë dhe bëjnë pazar mbi pagesën. S.  i thotë se për të ndenjur 2-3 orë duhet të paguajë 200 000 lekë, pasi 1 orë e ka 10 000 lekë të rinj. Nuk dihet nëse janë takuar.

“TË SJELL NJË TË URTË”

Në datë 22.12.2015, ora 20:40, S. është telefonuar nga nr.06…346, i cili i thotë se “Kisha një shok unë një cikë”. Silvana i thotë “atë që ishte atë ditë”. L. (klient) i thotë “Po tjetër”. S.  përgjigjet “skam tjetër, tjetra është e sëmurë, kjo tjetra është e mirë, e urtë”. Lisi “Ja të pyes të marr prapë”.

Në këtë moment ora 20:46 S.  i shkruan një vajzë me nr.06…72 dhe i thotë “A do të vish në Elbasan, do të marrim nga 100”. Më pas, në 20:47, S. i shkruan L.  “O Lal ça thanë”. S.  ndërkohë i shkruan vajzës që kërkon, duke i thënë “ça do bësh se pret përgjigje ai”.

Ajo i thotë “të kthej përgjigje për 10 minuta sa të flas me këtë shokun, por ajo nuk i kthen përgjigje”. Ndërkohë rezulton se S. a i shkruan L. “A të marr një tjetër se ajo e ka fikë telefonin”. L. nuk i përgjigjet.

Në datë 30.12.2015, L. i shkruan SMS  S. duke i thënë se po ikën në Elbasan, se do takojë një kosovar, të cilit ka për t’i marrë disa lekë. “Hajde në Elbasan”, i thotë. S  i kthen përgjigje se nuk vjen R. L. i shkruan kush është ajo që do të vijë. S.  i përgjigjet R. Më pas nuk ka më komunikim.

PËR “PUNË” NË ELBASAN

Nga transkripti i bisedave te nr.06…362, i cili i përket të pandehurës S. N. kanë rezultuar disa biseda, të cilat nga organi i akuzës janë konsideruar me interes për hetimin e kësaj çështjeje penale.

Në datë 18.01.2016, ora 22:21 nr 06…889, ka telefonuar S. dhe bëjnë bisedë për të shkuar te personi që e telefonon dhe do të marrë me vete gocën e tezes, e cila është e ngjashme si një vajzë tjetër, me të cilën ka qenë dhe një herë tjetër.

Telefonuesi i thotë “mirë, hajt”. Numri i telefonit 06…889 i përket L., sipas emrit të regjistruar në rubrikën e telefonit të S. Po në këtë moment, në orën 22:25, S. ka telefonuar një vajzë dhe i thotë të ikin tek ai i asaj në Elbasan, ku do të marrin dhe një vajzë tjetër.

Në bisedën telefonike të datës 24.12.2015, ora 19:50, S.a ka telefonuar një vajzë që quhej R…, të cilës i ofron të shkojnë në Elbasan për “punë”. R… është me menstruacione dhe nuk mund të shkojë.

Duke e parë që R… nuk ishte e disponueshme, ajo ka telefonuar mbesën e saj A., ku e fton të shkojnë në Elbasan te një person që ka qenë dhe më parë. Më pas, S. ka telefonuar Engjëllin, por në nr. 06…160 dhe i thotë të shkojnë në Elbasan dhe do të marrin A. se është duke folur me L.B.

SEKS DHE DROGË

Po nga transkripti i bisedave telefonike rezulton se në grupin që S.  po shkon është i përfshirë dhe nr. 06…339, me të cilin bën biseda për të pirë narkotikë. Nga transkripti i bisedave të nr. 06…431, që i përket shtetases Xh. D., në datën 08 janar 2016, ajo bisedon me një numër të paidentifikuar nga ana e Policisë Gjyqësore, i cili rezulton të jetë mashkull. Ky person e ka telefonuar nga ora 16:25 deri në orën 19:00, me intervale.

Ky person i kërkon asaj të shkojë me të duke nënkuptuar se do kryejnë marrëdhënie seksuale, por më parë do hanë darkë së bashku dhe do shkojnë në hotel. Nuk është e qartë nëse janë takuar ose jo dhe ku kanë shkuar.

“SHEFI PAGUAN MIRË”

Në datë 12.01.2016 janë konstatuar biseda të nr. 06…205, që i përket S. N., e cila e fton të pandehurën Xheje D. të shkojë me klientë që S. ndodhej, por personi rezulton i paidentifikuar nga ana e Policisë Gjyqësore.

Po kështu S. i shprehet qartë Xh. për pagesa të mira nga klientët. Në datë 12.01.2016, ora 01:43, i thotë: “Ai jep mirë. Ai që ishim me Anën”. S.  në një moment tjetër e nxit që të marrë në telefon I. në datë 12.01.2016, ora 05:46.

Me interes vihet re biseda e datës 12.01.2016, ku nr. 06…009 i thotë Xh.  se është shefi i madh dhe numrin ia ka dhënë Sona (S). Ky identifikohet me emrin I. Në datë 15.01.2016, e pandehura Xh. D. është telefonuar nga S. N., e cila i ka thënë të vishej dhe të dilte.

POLICI-TAKSIST

Nga transkripti i bisedave të nr. 06…769, që i përket punonjësit të Policisë, Engjëll Y., vihet re se ai ka marrë thirrje të shpeshta nga nr. i S, duke filluar nga data 24.12.2015 e në vazhdim.

Në bisedën telefonike të datës 25.12.2015, ora 05:54, rezulton se e pandehura S.N. e pyet E.  se sa lekë i ka dhënë atij ai çuni që shkuan te L.E i përgjigjet 30 mijë lekë, ndërsa Lisi 70.

Po kështu në datë 25.12.2015, ora 23:59, E. ka telefonuar S. në nr. 06…205 dhe e pyet se ku të shkojë ta marrë dhe ajo i thotë te G… Në datë 28.12.2015, S. e ka telefonuar E. në nr. 06…362, ora 05:36, dhe i thotë të shkojë te një hyrje që kishin qenë dhe më parë, ku E. i thotë se ka qenë me V. dhe e di ku ndodhet si hyrje. Sipas bisedave të datës 30.12.2015, rezulton se E. ka njohje edhe me R., e cila është kushërira e S, e përfshirë dhe ajo në prostitucion.