Një nga mënyrat se si shqiptarët ushqehen është dhe përmes parave që ju dërgojnë të afërmit e tyre nga emigracioni. Po duket se dhe emigrantët nuk kanë rritur shumë mirëqenien e tyre në këto dy vjet, pasi kanë dërguar edhe këtë vit të njëjtën shumë parash si vjet. Mësohet se emigrantët në 3 muajt e parë të vitit kanë sjellë pranë të afërmve të tyre në Shqipëri 150 milionë euro, shumë kjo që është pothuajse e barabartë me të njëjtën periudhë të një viti më parë.

Gjithësesi sipas të dhënave të Bankës së Shqipërisë në bilancin e pagesave ky është niveli më i lartë i remitancave që prej 2012-tës.
Në vitin 2018, të ardhurat nga emigrantët arritën në 670 milionë euro, duke u rritur me 5.3% në krahasim me 2017.
Ky është niveli më i lartë që nga viti 2012, teksa një vit më pas në 2013, prurjet e emigrantëve arritën në nivelin më të ulët që pas viteve ’90, duke zbritur në 545 milionë euro. Rënia e tyre ishte e pritshme, pas maturimi të ciklit të emigracionit, ku individët që kanë ikur në vitet 1990-2000, krijuan familjet e tyre dhe filluan të shkëpusin lidhjet me vendin dhe të afërmit. Por, pas vitit 2013, prurjet e emigrantëve filluan të rriten sërish, për të mbritur në 2018-n, ku rritja në vlerë absolute ishte rreth 34 milionë euro, më e larta e gjashtë viteve të fundit.