Qeveria ka miratuar tarifat, ku e para varion nga 1500 lekë për familjarët deri në 3000 për bizneset, e cila do t’i paguhet Sekretariatit Teknik të Këshillit Kombëtar të Ujit. Tarifa e dytë varion nga 500 lekë deri në 100 mijë lekë dhe do t’i paguhet Këshillit Kombëtar të Ujit, pagesë që bëhet një herë në momentin kur bëhet aplikimi për përdorimin e ujit. Këto tarifa janë propozuar nga Ministria e Bujqësisë, Zhvillimit Rural dhe Administrimit të Ujërave dhe ndryshojnë në varësi të aktivitetit të biznesit. Qeveria ka arsyetuar se tarifat e reja do të përdoren për të mbuluar shpenzimet administrative të enteve dhe sekretariateve që bëjnë politikat e sektorit. Aktualisht menaxhimi i ujit është në fazë tranzicionale që vjen prej transferimit të kompetencave nga pushteti qëndror te ai lokal.