Nuk mund të mungonte edhe këtë javë, komunikimi në “Facebook” i kryeministrit Edi Rama, i cili këtë herë preku temën e arsimit. Rama foli për vlerësimin që vendi ynë mori nga “Pisa” për nivelin e arsimit në vend. Ai tha se ka një rritje të numrit të nxënësve me rezultate të larta. Rama përmendi arritjet në sistemin arsimor, por sipas tij ka ende punë për të bërë.

Kryeministri u shpreh se do të jetë gjithmonë i pakënaqur me veten dhe qeverinë. Ai përmendi edhe vështirësitë me të cilat përballen familjet shqiptare, duke pohuar se ka prindër që si blejnë dot dhurata fëmijëve.

“Këta javë morëm një lajm shumë të mirë për Shqipërinë e gjeneratës tjetër. Programi ndërkombëtar i vlerësimit të nxënësve Pisa është një vlerësim ndërkombëtar i standardizuar dhe i mirënjohur botërisht për politikbërësit në rang global mbi nivelin e përdorimit të kompetencave, matematikore, gjuhësore shkencore të nxënësve 15 vjeçarë. Shqipëria kishte marrë pjesë në 3 edicione dhe rezultat ishin vijimësisht shumë të dobëta.

Sivjet vendi ynë u rendit jo thjesht më mirë se asnjëherë tjetër, por në një pozicion ku la pas plot 21 vende të tjera, ndër të cilat dhe vende që në shumë aspekte janë më të përparuara sesa i yni. Brenda këtij lajmi të mirë ka plot të dhëna inkurajuese, sikundër dhe plot mësime. Interesante është se nëse do llogariteshin vetëm rezultatet e vajzave, atëherë Shqipëria do të ishte në një pozicion edhe më të mirë.

Nuk jam i kënaqur me çfarë kemi bërë. Sado që krahasuar me 3 vjet më parë kemi bërë vërtet shumë. Disa u hodhën përpjetë dhe e komentuan shprehjen time të pakënaqësisë ndaj qeverisë si dobësi, apo më keq akoma si dorëzim. Por në fakt e kundërta është e vërtetë. Unë kam qenë dhe do të mbetem deri ditën e fundit në këtë zyrë i pakënaqur me veten dhe me qeverinë që drejtoj”, tha Rama.