Dy krerët e aleancës qeverisëse Ilir Meta e Edi Rama janë takuar sot, larg syve të medias e publikut. Sipas neësbomb.al Rama e Meta, janë takuar rreth orës 8:30, në fshehtësi të plotë, në një vend në periferi të Tiranës, pikërisht te “Sofra e Ariut”. Takimi i dy krerëve të aleancës mësohet se ka përfunduar vetëm ndërsa ata kanë vendosur të mos zbulojnë temat e diskutimit të takimit. Askush nga selia e Kuvendit por edhe nga stafi i Ramës nuk kanë folur për atë ç’ka ndodhur dhe për atë që është diskutuar në takim. Ky takim vjen pikërisht në momentin kur mes PS dhe LSI tashmë ka filluar një “luftë e ftohtë” sidomos pas konferencës për shtyp të LSI ku u shpreh shqetësimi për hashashin dhe goditja për policinë e shtetit. Ishte i pari kryeministri Rama që reagoi për raportin e DASH që ishte bërë në dritën e të dhënave që kishte raportuar vetë policia e shtetit. Ndërsa Saimir Tahiri ishte më i ashpër me deklaratën se kishte nga ata që nëpërmjet këtij raporti kërkonin të përfitonin edhe vota. Kjo është një ndër çështjet e para që do të sqarohet për koalicionin, por ndërkohë, edhe diskutimi për emrin e Fatmir Xhafës, nuk do të mbetet jashtë vëmendjes. Ndërkohë mund të jetë diskutuar edhe rreth sitautës aktuale pasi pavarësisht ndryshimeve në qeveri, kreu i PD, Lulzim Basha, nuk ka ndërmend të lërë “Çadrën e Lirisë”. Edhe pse janë ambasadorët të cilët kanë ndërhyrë për zgjidhjen e krizës, deri tani nuk ka asnjë rezultat konkret nga negociatat.