Kryeministri Edi Rama ka dhënë një intervistë për Financial Times. Duke folur nga Brukseli, Rama tha se Shqipëria ka bërë atë që i është kërkuar nga Brukseli, ndaj tani pret hapjen e negociatave. Kryeministri i Shqipërisë kërkon fillimin e bisedimeve për vendin e tij për t'u bashkuar me BE-në si pjesë e një zgjerimi të Ballkanit Perëndimor për të forcuar sigurinë evropiane. Edi Rama tha se do të ishte "çmenduri" që BE të mos përqafojë një rajon qendror në rrugët e migracionit, të cilin Rusia e shikon si një çmim strategjik. Kryeministri argumentoi se Tirana kishte luftuar fuqishëm kundër problemeve të drogës dhe korrupsionit gjyqësor, duke e bërë atë një kandidat serioz për të përmbushur ambiciet e Brukselit për shtetet e Ballkanit Perëndimor, për të hyrë në vitin 2025. "Ne do të habiteshim nëse Shqipëria nuk do të fillojë menjëherë negociatat, pasi ka bërë saktësisht gjithçka që i kërkuan të bëjë", tha në një intervistë, kryetari i qeverisë, duke theksuar se Serbia dhe Mali i Zi tashmë kanë filluar bisedime për pranimin në BE. "Tani ajo që duam është thjesht të shpërblehemi për atë që kemi bërë dhe që procesi të jetë i drejtë dhe të jetë i parashikueshëm"-tha Rama gjatë një interviste dhënë për Financial Times ndërsa ishte për vizitë në Bruksel përpara samitit të kësaj jave në BE. Komentet e tij pasqyrojnë zhgënjimin që ka Tirana, për faktin që Shqipëria ende nuk është lejuar të nisë bisedime përkundër progresit që ka bërë në reformat ekonomike dhe politike.