Asnjë fond për investime nuk do tu japë Rama kryebashkiakëve, nëse nuk do të dinë të menaxhojnë punët dhe të përzgjedhin staf të kualifikuar. Madje kryeministri ka ngritur dhe akuza në lidhje me menaxhimin e ujit duke iu thënë se problem është se drejtuesit janë të paaftë, të korruptuar dhe drejtojnë struktura tërësisht primitive dhe se ndërmarrjet e ujësjellësit nuk janë lopë për tu mjelë.

“Kush nuk bën rezultat, nuk do marrë lekë! Dhe të përgjigjet atje para popullit që e ka zgjedhur, pse nuk ka bërë rezultate! Kryetari i Bashkisë është përgjegjës i drejtëpërdrejtë për ta garantuar këtë shërbim, cilësinë dhe menaxhimin e ndërmarrjes së ujësjellësit. Problemi janë të paaftët dhe të korruptuarit, që drejtojnë struktura tërësisht primitive dhe të pareformuara”, tha Rama
Ajo që ra më në sy ishte mënyra, që zgjodhi Rama për të komunikuar me Kryetarin e Bashkisë së Pogradecit, që është i djathtë, Eduard Kaprin. Teksa ky i fundit i ka folur për problemet e bashkisë, që ai mbulon duke i thënë se nuk kanë fonde për ti kthyer kanalet në të shfrytëzueshme dhe se masa e fondit është për të ardhur keq u ndërpre nga Rama.
Kryeministri i tha: Mos vajto shumë, mos na dil nga axhenda duke gjetur arsye për të vajtuar se për të vajtuar kemi plot. Sa ke ndërmend të flasësh, na jep një orar të lutem, që disa të shkojnë të hanë bukë dhe pastaj të kthehen…