Zherard Pike mbetet mbreti i polemikave, kur bëhet fjalë për të ndezur luftën Barcelona-Real Madrid. Mbrojtësi katalanas arrin të krijojë zhurmë edhe kur nuk bën thuajse asgjë, sepse mbrëmë pas ndeshjes postoi në Twitter disa pika, pa shkruar asgjë. Postim që të gjithë e interpretuan si një thumb ndaj Realit, ashtu si Sergio Ramos, i cili reagon ashpër: “Le ta rikthejë filmin dhe të shohë ndeshjen me PSG-në. Ndoshta ato pikat do t’i kthehen kundër”.

Mbrojtësi i Realit shënoi një autogol dje ndaj Bajernit, por autogoli nuk ndikoi te kualifikimi i Realit, që tashmë shkon në gjysmëfinale: “Ishte një ndeshje shumë e ashpër, kundër një rivali mjaft të fortë, që na e ndërlikoi shumë kualifikimin, por ishte diçka që e prisnim. Reali ishte superior në tërësi, por gabuam vetëm në faktin që e lamë Bajernin në lojë, ashtu si në ndeshjen e parë, ndaj vuajtëm deri në fund dhe shkuam në shtesa”.

Ramos iu përgjigj edhe Arturo Vidalit, i cili foli për grabitje: “Për çfarë garbitjeje flet Vidal? Flasim për një gol në pozicion të mundshëm jashtë loje, ashtu si ishte edhe Myler. Herë t’i japin pro e herë kundër, jeta vazhdon. Eliminuam një ndër favoritet, tani duam titullin”.

Kristiano Ronaldon e fishkëllyen në disa momente gjatë ndeshjes, por Ramos mundohet të largojë tensionin: “E kuptoj publikun, e kuptoj edhe Kristianon. Ai jep gjithnjë maksimumin, mund të ketë ndeshje të mira apo të këqija, por njerëzit duhet të mendohen pak më shumë dhe të mos harrojnë sa shumë i ka dhënë Ronaldo këtij klubi. Fishkëllimat vijnë sepse tifozët duan gjithnjë versionin më të mirë të një futbollisti”.