Në ditët e fundit të muajit Korrik, Bashkia e Korçës ndërmori një aksion për të mbyllur dyqanet në pazarin e vjetër të këtij qyteti, i klasifikuar si monument kulture i kategorisë së parë. Këshilli bashkiak me anë të një vendimi të posaçëm ka përcaktuar listën e aktiviteteve që lejoheshin të kryeshin në pazarin e vjetër të qytetit.
Bashkia i dha një tjetër drejtim këtij pazari, duke lejuar tregtimin e produkteve artizanale, me qëllim thithjen e sa më shumë turistëve vendas dhe të huaj. Por sot, një muaj pas këtij vendimi, qytetarët kanë denoncuar pranë IN television, panoramën e vërtetë të këtij pazari.

Siç shihet qartë në video apo fotot e sjella pranë redaksisë tonë, pamja e vetme janë kanxhellat e ulura dhe “drynët” në çdo derë të dyqaneve që janë të vendosura pranë pazarit të vjetër të qytetit të Korçës.
Vendimi për ta kthyer pazarin e vjetër të Korçës në artizanal është kundërshtuar nga tregtarët e kësaj zone. Ata thonë se nuk ka aq turizëm gjatë gjithë vitit, sa të nevojitet një Pazar i tërë për prodhime artizanale.
E në këto kushte Bashkia e Korçës do të ishte mirë që të rishikonte dhe një herë këtë vendim, pasi jo vetëm që solli mbylljen e tregut por ai ka lënë dhjetra familja pa punë, duke ua vështirësuar jetesën.
Në pazarin e vjetër të Korçës janë të vendosura 140 dyqane, kryesisht me sipërfaqë shumë të vogël. Kjo për faktin e pazari i vjetër është ndërtuar 150 vite më parë, e viti 2016 duket se ka qënë më i vështirë për të, pasi për herë të parë qytetarët dhe turistët kur të mbërrijnë në këtë zonë kanë vetëm një pamje, atë të drynave në çdo derë të 140 dyqaneve.