BE ka rizbuluar një interes në Ballkan, pasi u alarmua nga përpjekjet e Rusisë për të ushtruar ndikim atje dhe nga përkeqësimi i marrëdhënieve midis disa vendeve në një rajon që u përfshi në luftë vetëm disa dekada më parë. Kështu e nis shkrimin e tij gazetari Basil Venitis, “Rrugëtimi i vështirë i Ballkanit drejt BE”. Në analizën kushtuar situatës në të cilën ndodhen vendet e rajonit, Ventis thotë se “kriza është ankoruar në Ballkan. “Kriza demokratike në Ballkan është e qartë për të gjithë, dhe ideja e një konsensusi demokratik nuk ekziston më. Të gjitha vendet e Ballkanit, pavarësisht nëse janë shtete anëtare të BE-së apo jo, kanë shfaqur një prirje të vazhdueshme rënëse gjatë dhjetëra viteve të fundit”-analizon gazetari i pavarur. Duke analizuar qeveritë e vende të Ballkanit, Venitis flet me pozitivitet për Shqipërinë ndërsa etiketon si narcist presidentin serb Aleksandër Vuçiç. Komisioni ka lavdëruar Serbinë për përafrimin e legjislacionit të saj me BE-në, dhe ky është vendi që ka më shumë shpresë për bashkimin me BE. “Nëse dikush mund të bëhet një surprizë e parë në garën e anëtarësimit, është Shqipëria, tashmë një anëtare e NATO-s”-analizon autori. Të gjithë anëtarët e tjerë të ardhshëm të BE në Ballkanin Perëndimor vuajnë komplikime themelore. Maqedonia ka probleme, për sa kohë që Greqia refuzon ta njohë emrin e saj. Mali i Zi dhe Kosova nuk mund ti bashkohen BE pa zgjidhur problemet me Serbinë. Bosnja dhe Hercegovina është në pozitën më të keqe të të gjitha vendeve të rajonit.