Gjendet e vdekur këngëtarja e famshme 25-vjeçare

Këngëtarja e famshme e muzikës K-pop, Sulli, ish pjesëtare e bandës muzikore f(x) është gjetur e pajetë në banesën e saj.

Aktorja dhe këngëtarja 25-vjeçare u gjet e vdekur nga menaxheri pasditen e sotme.

“Deri tani duket se ajo ka kryer vetëvrasje, por pistat e tjera mbeten të hapura,” tha një zëdhënës i policisë koreane.

Sulli, emri i së cilës është Choi Jin-ri, u gjet e pajetë në katin e dytë të banesës së saj në jug të Seulit. Në vendngjarje u gjet edhe një letër, por përmbajtja e saj nuk është analizuar ende.

Muzika Korean Pop, apo K-Pop, ka njohur përhapje të madhe në mbarë botën gjatë dekadës së fundit. Artistët apo siç quhen ndryshe, idhujt, duhet të trajnohen për vite të tëra në muzikë, aktrim dhe vallëzim përpara se të shfaqen për herë të parë në skenë.

Yjet e këtij zhanri janë gjithmonë nën presion të madh, çka është lidhur me krizat e shëndetit mendor.