Ministria e Shëndetësisë dhe Mbrojtjes Sociale ka miratuar rritje të masës së përfitimit për invalidët paraplegjikë dhe tetraplegjikë, si dhe kujdestarët e tyre. Rritja përcaktohet me anë disa udhëzimeve që mbajnë datën 27 Gusht dhe janë botuar ditën e hënë në Fletoren Zyrtare. Pagesa për invalidët paraplegjikë dhe tetraplegjikë bëhet 10.540 lekë në muaj, nga 10.330 lekë. Ndërsa për kujdestarët, masa e përfitimit shkon në 11.070 lekë në muaj, nga 10.850 lekë. Gjithashtu, rritet edhe masa e përfitimit për individët që kanë statusin e të verbërit. Pagesa e re bëhet 11.965 lekë, nga 11.500 lekë. Por duket se bëhet fjalë për një indeksim të kësaj pagese në bazë të inflacionit të çmimeve, se sa një rritje reale. Kjo politikë ndjek indeksimin e pensioneve të pleqërisë të bërë më herët gjatë vitit. Kjo prek edhe masën e përfitimit të pagesës së aftësisë së kufizuar e të ndihmësit personal, sipas kategorive të ndryshme. Pagesa e re në bazë të këtij vendimi ka hyrë në fuqi që nga 1 Shtatori i këtij viti, ndërkohë që efektet financiare që rrjedhin do të përballohen nga fondet e akorduara për Ministrinë e Shëndetësisë dhe Mbrojtjes Sociale.