Dy futbollistë të tjerë shqiptarë mund të luajnë këtë vit në Serinë A. Klubi siçilian i Palermos, synon të përforcohet me lojtarë të kombëtares, për të mos rënë nga kategoria. Palermo rrezikon të mos luajë sezonin e ardhshëm në Serinë A dhe klubi siçilian po mendon përforcimet këtë muaj. Shpresat, mes të tjerëve, janë edhe tek dy lojtarë të kombëtares së Shqipërisë. Armando Sadiku e Jahmir Hyka. Sulmuesi dhe lojtari ofensiv cilësohen si objektiva të klubit për të pasur një ekip më të fortë në fazën e dytë të edicionit. Sadiku vlerësohet për aftësinë e lartë për të shënuar gola, pavarësisht ndonjë dyshimi për gjendjen e tij fizike. Nuk dihet ende nëse Palermo do t’i bëjë ofertë Zyrihut apo do të kërkojë që ta ketë sulmuesin në huazim. Hyka po ashtu vlerësohet lart nga palermitanët. Edhe pse objektivi kryesor në atë rol është Çikarini, sërish shqiptari mbahet në vëmendje, i pëlqyer për aftësitë teknike, golat dhe asistet, si dhe për pjekurinë që ka arritur tani në moshën 28-vjeçare. Me gjasë, numri i shqiptarëve në Serinë A do të rritet në 2017.