Afrimiteti i Semit me Donaldin është diskutuar tepër, si mes banorëve si edhe në publik. Semi njihet për shoqërinë e ngushtë prej 15 vitesh me prezantuesen Bora Zemani dhe siç dihet tashmë brenda shtëpisë është edhe Donald Veshaj, ish i dashuri i Borës.

Pas gjithë aludimeve që duket se nuk kanë ndërmend të ndalen, ka reaguar më në fund dhe vetë Bora. Përmes një postimi në Instagram, ajo ka treguar se Semi dhe Donaldi kanë një raport shoqëror mes tyre dhe se janë krah e mbështetje për njëri-tjetrin në ‘Big Brother’.

“Më duhet t’i përgjigjem absurditetit që po ndodh. Sado të përpiqem të jem indiferente siç bëj gjithmonë, e kam të pamundur kur shoh që përmendet emri im çdo ditë në lajme, thashetheme e të folura pa takt. Kam punuar me përulësi që 16-vjeç dhe pa dashur të fitoj në publik vëmendje të pamerituar.

Asnjëherë nuk kam besuar që gjërat fitohen qyl, duke qëndruar në vend e duke u marr me fjalë. Në fakt kam dashur ta fitoj vëmendjen vetëm përmes punës sime dhe kurrë prej jetës personale. Ndoshta më keni parë shpesh në median rozë jo prej dëshirës sime, jua siguroj. Kjo edhe nga fakti që duroj shumë sado budallallëqe thuhen e shtohen përditë. Unë shoh punën dhe jetën time pa përmendur e pa përfshirë askënd tjetër, aq më tepër duke përdorur apo keqpërdorur dikë tjetër. Nuk jam rritur në kurriz të askujt e për këtë jam krenare!

Kjo eksperiencë nuk më takon mua, por Donaldit dhe Semit. Ata të dy janë njerëz të lirë të sillen dhe ta shfrytëzojnë si të duan. Di të them që kanë pasur një marrëdhënie shumë të mirë jashtë prej meje. Nuk dyshoj në asnjë moment që Semi mund të ketë pëlqim më shumë se shoqëror për Donaldin. Nga ana tjetër edhe pse nuk jemi bashkë prej kohësh, unë dhe Donaldi gëzojmë respekt për njëri tjetrin dhe nuk do të krijonim kurrë situata të tilla. E shoh thjesht si mbështetje dhe krah për njëri-tjetrin. Kaq. E kuptoj që duhet të komentoni, por mos e ekzagjeroni dhe mbi të gjitha mos shpifni”, ka shkruar Bora.