Sezoni turistik. Hapen 26 qendra shëndetësore verore

Publikuar më: 13:54 06-06-2018

26 qendra shëndetësore do të jenë në shërbim të pushuesve përgjatë sezonit turistik. Prej ditës së sotme këto qendra nisin funksionimin duke ju ardhur në ndihmë pushuesve nëse do të kenë komplikacione të ndryshme. Nga qyteti i Vlorës Ministrja e Shëndetësisë Ogerta Manistriliu, deklaroi se ato do të jenë të hapura çdo ditë të javës 24 orë.

‘’Qendrat shëndetësore verore janë në shërbim të pandërprerë përgjatë gjithë vijës bregdetare dhe në zonat me turizëm malor deri në mesin e muajit shtator. Kemi vendosur një standard të ri për këto qendra, të cilat do të ofrojnë kushte dinjitoze për pushuesit e shumtë vendas dhe të huaj që frekuentojnë Shqipërinë gjatë këtij sezoni ‘’ka thënë ministrja Manastriliu.

Sa i takon risive të këtij viti sipas Ministres së Shëndetësisë, në Dhërmi veç Qendrës ekzistuese është ndërtuar edhe një qendër e re, ndërkohë dhe në Tale si një prej zonave me frekuentim të lartë nga pushuesit, për herë të parë ka nisur funksionimin një qendër e re me shërbim 24 orësh. Për mirëfunksionimin e këtyre qendrave, 119 mjekë dhe infermierë janë trajnuar për çdo emergjencë në zonat turistike nga Valbona deri në Ksamil. Këto pika shëndetësore janë pasjisur me medikamente dhe mjetet e nevojshme sidomos për problemet e tensionit të gjakut, zemrës, virozave stinore etj.