Keni vënë re si tensionohen marrëdhëniet shqiptaro-greke si rrufe në qiell te hapur! Pse? Sepse shoqëria civile në të dy vendet, një pjese e medias, në të dy vendet, për hir të së vërtetës, më shumë andej kufirit, nuk janë në pozita të shëndetshme, më shumë kanë aftësinë të helmojnë opinionin publik, se ta qetësojnë. Në gjithë këtë përplasje të këtyre ditëve Shqipëri-Greqi me protagonist Kryeministrin tonë, më ka ngelur në mendje komenti i një qytetari të thjeshtë, emigrant në Greqi i cili shkruante: “Bë gallatë ti byrazer bë, po ne e hamë”. Janë këta emigrantë që e njohin Greqinë dhe politiken greke po aq mirë sa Rama, në mos më mirë.

Kjo fjali ka shumë të vërteta brenda, pavarësisht se Kryeministri ynë ka të drejte kur thotë se prishja e rreth 20 shtëpive në Himarë nuk është provokim, ka të drejtë që ngre hapur çështjen çame, ka të drejte të marrë informacion për pasuritë nënujore në kufirin detar Shqipëri-Greqi, por në te njëjtën kohë duhet të mendojë dhe për këta 700 mijë njerëz që jetojnë atje…Jo duke mbyllur gojën, duke e kthyer heshtjen në mall që shitet, nuk po them këtë se mos keqkuptohem, por jo duke u bërë historian nga pozitat e Kryeministrit, duke folur për histori Akropoli, duke u shprehur nuk jemi më të vegjël etj etj që sa do ta kundërshtojë nuk është as më pak e as më shumë provokim prej Shaban Qoseje.

Është e lehtë të sillesh si lider i Aleancës Kuq e Zi e të fitosh duartrokitjet nacionaliste të shqiptareve brenda dhe jashtë kufirit dhe është tjetër gjë të jesh Kryeministër serioz që mendon të rregullosh përditshmërinë si të çameve ashtu edhe të emigranteve shqiptarë që jetojnë në Greqi. Kryeministri ynë e di qe Greqia është nje femër naive qe bie me dëshirë pre e të tilla provokimeve ndaj përveç Libidos dhe kënaqësisë që mund t’i japë kjo lojë duhet të mendojë dhe për pasojat që mund të ketë sjellja e Greqisë ndaj bashkëpatriotëve të vet.

Nuk e di, roli disa herë i Shaban Qoses do jetë thjesht një orgazëm e hedhur në kosh për të dhe me pasoja për përditshmërinë e bashkëpatriotëve të vet, apo mund të jetë dhe një lojë për të futur ne grackë Athinën me qëllimin për të filluar dialogun serioz për zgjidhjen e problemeve. Do ishim shumë të lumtur të gjithë nëse roli i Shaban Qoses do të kishte këtë rezultat të dytë. Të presim, gjithsesi çka po ndodh është një lojë e rrezikshme. Ndërsa bashkatdhetarët tanë atje mund ta kenë një shpresë që Cipras të kopjoje Vuçiç i cili e pranoi publikisht ndryshe nga ai se Rama është një lider global. E keni vënë re që marrëdhëniet Shqiptaro- Serbe janë përmirësuar: Pse? Sepse duket qarte që Vuçiç nuk i merr seriozisht ato që Rama thotë. Cipras të lutem ndiq te njëjtën rrugë dhe Ballkani do jetë më i qetë.