"Kim Jong-un, udhëheqësi i Koresë së Veriut, po kërkon luftë me provën e fundit dhe më të fuqishme, të bombës bërthamore", ka thënë i dërguari i SHBA në Kombet e Bashkuara.

Nikki Haley tha në një takim urgjent të Këshillit të Sigurimit, në Nju Jork, se Amerika nuk donte një luftë, por durimi i saj nuk ishte i pakufi.

SHBA do të paraqesë së shpejti një rezolutë të re në OKB, për të ashpërsuar sanksionet, ndërsa Kina, aleati kryesor i Veriut, ka bërë thirrje për një kthim në negociata dhe Zvicra ka ofruar të ndërmjetësojë.

Koreja e Jugut zhvilloi të hënën stërvitje të drejtpërdrejta me zjarr, duke simuluar një sulm në vendin e testimit bërthamor të Veriut.

Raportet sugjerojnë se Koreja e Veriut po përgatit testimin e raketave të reja, në ditët në vijim.