Dy këngëtaret shqiptare Ronela Hajati dhe Rovena Dilo kanë debatuar në lidhje me këngën që zgjodhi kolegu i tyre Robert Aliaj për të konkuruar në festivalin “Kënga Magjike”. Teksa ishin të ftuara në "Post Kënga Magjike", Ronela u kthye kundër Robertit duke u shprehur se me këngën "Ah ku më hodhi Zoti" ai duhet të recitonte diku tjetër dhe jo në “Kënga Magjike”.

Ndërkohë Rovena dhe Aurela ndërhynë duke thënë se mesazhi që përcolli Roberti ishte mjaft i fortë, por ylli i “Vuj”, këmbënguli në mendimin e saj duke u rikujtuar këngëtareve të tjera se muzikën e tyre Aliaj e quajti tallava. Lidhur me këtë debat, këngëtarja Rovena Dilo foli edhe në emisionin e Rudina Magjistarit. Ajo sqaroi se nuk është zënë me Ronelën dhe shtoi se ishte thjesht një debat në të cilin ajo kishte mbrojtur Robertin .

“Roberti interpretoi vargje, bejte apo le t’i marrim si të duam. Ai doli në skenën e festivalit dhe solli zhanrin e tij, por ky lloj zhanri, protesta apo revolta është një zhanër shumë i përhapur nëpër botë. Të gjithë i drejtohen problemeve sociale, politike apo problemeve shoqërore nëpërmjet këngëve. Dhe Roberti solli këtë lloj kënge dhe u duartrokit jashtëzakonisht shumë sepse ishte momenti i kësaj kënge, ishte ide e bukur e përshtatur me protestën e studentëve.

Roberti nuk doli natën e fundit dhe ajo që ndodhi ishte që Ronela tha le të shkojë në Kongres Roberti. Unë dhe Aurela që ishim afër nuk e mirëpritëm këtë sepse një artist nuk del në skenë vetëm për të kënduar. Ronela e kishte për tematikën. Ngrihet Aurela e para dhe po e kundërshtonte për këtë etiketim që po i bënte këngës dhe unë u ngrita dhe i thashë ajo këngë është si gjithë të tjerat. Dhe ajo më tha nuk është këngë, është recitim. Unë ia ktheva duke i thënë që ti po hedh poshtë repin. Unë nuk u zura me Ronelën, ai ishte një debat. Unë mbrojta Robertin sepse ajo në mënyrë të padrejtë tha se kënga e tij nuk duhet të ishte pjesë e festivalit. Unë nuk e kam me Ronelën këtë debat, e kam me të gjithë ata që mendojnë si Ronela”, tha këngëtarja.