I sapo afirmuari në krye të diplomacisë shqiptare Ditmir Bushati, i është përgjigjur shqetësimit të ngritur nga ministrja në ikje e Integrimit Klajda Gjosha për shkrirjen e kësaj institucionit që ajo drejton dhe bashkimin e tij me Ministrinë e Jashtme. Përmes një postimi në twitter, Bushati shkruan se “s’ka vend për shqetësim pasi siç thotë ai, integrimi në BE do jetë kryefjala e reformave të qeverisë së re”. Bushati shton se mirëpresin kontributin e opozitës, përfshirë edhe atë të Gjoshës. Ministrja e Integrimit reagoi menjëherë pas publikimit të emrave të kabinetit të ri qeveritar dhe tkurrjes së ministrive duke shprehur shqetësimin e saj. Nëpërmjet një postimi në Facebook Gjosha tha se “mendonte që qeveria do ta niste punën me prioritet madhor integrimin dhe jo ta çonte këtë dikaster në një cep të qeverisë”.