Rrugët e qytetit po patrullohen nga forca të shumta speciale të policisë, përfshirë këtu edhe ushtrinë.
 
Qarkullimi është në kaos në zonat ku u regjistruan shpërthimet. Sulmet në zemër të Europës kanë vënë në lëvizje vendet e tjera që kanë shtuar kontrollet nëpër aeroporte, metro dhe stacione autobusësh.

Ministri i Brendshëm italian Angelino Alfano sapo ka deklaruar se me ora 15.00 eshtë thirrur në një mbledhje të jashtëzakonshme Këshilli i Sigurisë Kombëtare.

Në diskutim alarmi i terrorrizmit pas atentateve sot në Bruksel.

Shefja e politikës së Jashtme në Bashkimin Evropian, Federica Mogherini ka reaguar në lidhje me shpërthimet në Belgjikë. Ajo doli në një konferencë shtypi me ministrin e Jashtëm të Jordanisë, Nasser Judeh në Aman, ku shprehu ngushëllimet për viktimat. "Sot është një ditë shumë e trishtë për Evropën", tha Mogerini e përlotur.

Kancelarja gjermane Angela Merkel thotë se sulmeve terroriste në Belgjiku duhet t’u përgjigjemi me solidaritet dhe vendosmëri. "Sulmet e urryera në Bruksel duhet të na bashkojnë. Solidaritet me viktimat dhe vendosmëri përballë terroristëve’’, deklaroi në emër të kancelares gjermane zëdhënësi i qeverisë, Steffen Seibert në “Twitter”.

Kryeministri britanik, David Cameron u shpreh i tronditur nga ngjarja në Belgjikë dhe njoftoi se në orët në vazhdim do të kryesojë një mbledhje të COBRA-s, këshilli më i lartë i sigurisë në Mbretërinë e Bashkuar.

Presidenti rus Vladimir Putin i ka shprehur ngushëllimet e tij Mbretit të Belgjikës, pas sulmit terrorist që ndodhi sot në Bruksel.

Zëdhënësi i Putinit, Dimitri Peskov, thotë se shefi i Kremlinit “i ka dënuar fuqishëm këto krime barbare”. Peskov shtoi gjithashtu se liderët rusë shprehën gjithashtu ngushëllimet e tyre për popullin belg.

Peskov thekson se “Putini ka konfirmuar solidaritetin e plotë të Rusisë me belgët në këto orë të vështira”.

Përforcim masash sigurie vihen re edhe në Gjermani, Francë dhe në vende të tjera të Bashkimit Europian.