Ministri për  Evropën dhe Punët e Jashtme, Ditmir Bushati, në kuadër të vizitës zyrtare në Irlandë ka marrë mbështetje për procesin e integrimit. Gjatë takimit me zëvendëskryeministrin dhe Ministrin e Punëve të Jashtme dhe Tregtisë të Irlandës, Simon Coveney rikonfirmoi mbështetjen e fuqishme dhe të pakushtëzuar të Irlandës për çeljen e negociatave me Bashkimin Evropian.

Ministri Bushati shprehu mirënjohjen për mbështetjen e Irlandës në procesin e integrimit evropian të vendit tonë dhe bëri një prezantim të  masave të  marra nga qeveria shqiptare në adresimin e 5 prioriteteve, veçanërisht në reformën në drejtësi dhe procesin e vetting-ut.

 

Në fokus të bisedimeve mes dy ministrave ishin çështjet e integrimit evropian të Shqipërisë, intensifikimi i marrëdhënieve bilaterale, thellimi i bashkëpunimit ekonomik, liberalizimi i vizave dhe çështjet e Brexit. vëmendje të veçantë në këtë takim, pati bashkëpunimi ekonomik në fushën e turizmit, agroturizmit etj.

Ministri Bushati u shpreh se thellimi i marrëdhënieve do të inkurajonte bashkëpunimin në të gjitha fushat kryesisht atë të turizmit.

 

 

 

Gjatë vizitës, Ministri Bushati u takua edhe me Seán Ó Fearghail, Kryetar i Dhomës së Ulët të Parlamentit irlandez si edhe me Kryetarin e Komisionit të Përbashkët për Çështje të BE-së, Michael Healy-Rae dhe anëtarë të këtij komiteti.

Gjatë takimeve palët shprehën vlerësimin maksimal dhe mbështetjen e tyre për arritjet e Shqipërisë në kuadër të procesit të integrimit në Bashkimin Evropian. Gjatë takimeve u diskutua mbi mundësinë e liberalizimit të vizave dhe inkurajimin e lëvizjes së lirë dhe pa barriera mes dy vendeve.