Deniza Miftari, 22 vjeçare, është shqiptarja e vetme e zgjedhur në asamblenë e zgjedhjeve lokale të komunës së Roseslares në Belgjikë. Deniza në moshën 3-vjeçare emigroi në Belgjikë së bashku me familjen. Duke garuar për Partinë e Gjelbër, ajo është më e reja dhe e vetmja, e cila vjen nga një familje refugjatësh.
Me rastin e zgjedhjes, ajo ka falënderuar babain e saj që nuk jeton më, sipas të cilës e ka motivuar për të garuar në zgjedhje. Ai ndërroi jetë rreth 5 muaj më parë.
‘’Dëshira jote më e madhe ishte ta përjetoje edhe këtë kapitull timin, por jeta vendosi ndryshe. Ti me sfidove në gjithçka që bëra dhe më mbështete kur rrezikoja të humbja gjithçka. Do e jepja tërë botën për t’i ndarë këto momente me ty sepse e gjithë kjo është padyshim meritë e jotja. Një odë për dashurinë që e kam për ty.
Tani mund t’i tregosh të gjithëve atje lart që “vajza e vogël’” është zgjedhur asamblistja më e re e Komunës së Roeselares. E di se do ishe krenar për mua por dije se unë jam edhe më krenare për ty.Faleminderit për dashurinë tënde dhe për besimin e pafund. Ti je frymëmarrja ime dhe gjithmonë do jesh arsyeja që do e vazhdoj jetën me kokën lart. Ky është vetëm fillimi. Të premtoj.
Të dua. Të dua o jetë”, shkruan Deniza.