Kanë kaluar shtatë ditë dhe asnjë shenjë nga Jayme Closs. 13-vjeçarja nga Barron, Wisconsin figuron e zhdukur që prej një jave. Prindërit e saj u gjetën të vdekur në shtëpinë e tyre në perëndim dhe Jayme nuk është parë më që nga ajo kohë. Sherifi i zonës zbulon informata të reja për natën kur e mitura nga Wisconsin u zhduk dhe prindërit u gjetën të vdekur. Autoritetet kanë kërkuar për Jayme Closs, 13 vjeç, që nga nata e të hënës, kur një thirrje misterioze e bërë në 911 çoi policët, në banesë ku u zbulua se prindërit e saj ishin qëlluar për vdekje në shtëpinë e familjes në qarkun Barron të veriperëndim të Wisconsin. Telefonata në 911 kishte ardhur nga telefoni i nënës së saj. Nga telefoni oficerët arritën të dëgjonin britma dhe klithma në sfond dhe thirrja u mbyll. Kur oficeri e telefonoi numrin mbrapsht një mesazh zanor tregoi se telefoni i përkiste Denise Closs, nënës së 13-vjeçares. Katër minuta më pas një patrullë policie mbërriti në banesë ku dera ishte hedhur përtokë. Jim i ati i vajzës u gjet pranë derës i qëlluar me plumb dhe brenda banesës edhe Denise. Policët vunë re se mungonte vajza 13-vjeçare ndërsa qeni i familjes ishte ende aty. Më pas një fqinj do të tregonte se kishte dëgjuar dy të shtëna, njëra pas tjetrës, vetëm kaq.
Grupi që po merret me hetimin e çështjes përjashton mundësinë që Jayme Closs të jetë përfshirë në vrasje. Mbetet ende mister fakti se ku është 13-vjeçarja dhe kush i vrau prindërit e saj. Policët nuk kanë arritur të zbulojnë shkakun. Në hetime është përfshirë edhe FBI.

Oficerët thonë se ata kanë kaluar nëpër më shumë se 1000 lajmërime, por deri më tani, nuk ka pasur asnjë shenjë të Jayme. Fëmijët e Jessica Hoisington janë më të rinj se Jayme. Ajo nuk e njeh familjen e Jayme Closs, por ndjen dhimbjen.
"Nuk mund të thuash që kjo nuk do të më ndodhë kurrë mua, askush nuk është i sigurt", tha Hoisington. Ajo thotë se do të marrë masa serioze. "Unë shkova dhe mora një qen, një laborator sepse mendimi që dikush mund të thyejë derën e shtëpisë dhe të më vrasë më tmerron, është krejtësisht e tmerrshme", tha Hoisington. Ajo thotë se kunata e saj zgjodhi të blinte një armë. Dhe frika është e justifikueshme sipas policisë. Ata thonë se Jayme 13-vjeçare është ende në rrezik. Fytyra e saj është në tabela dhe postera në të gjithë vendin, dhe emri i saj së shpejti do të vendoset në byzylykët që do të shpërndahen në vendlindjen e saj. Rrathë e gjelbër po shiten për 5 dollarë në qendrën e komunitetit. Mikesha e ngushtë e Jayme dhe mamaja e saj blenë 10. “Jim, Denise dhe Jayme ishin miqtë tanë dhe ne me të vërtetë duam që Jayme të gjendet dhe të vijë në shtëpi. Ajo është e rëndësishme për shumë njerëz "-thotë nëna e shoqes së 13-vjeçares. Ajo thotë se vajza e vogël është njeri me zemër shumë të madhe. "Ajo është kaq e ëmbël dhe e përulur gjithmonë duke menduar për njerëzit e tjerë më shumë se për veten. Mamaja e saj ishte shumë e ngjashme me të”-tregon ajo. Më tej ajo thotë se do të lutet së bashku me shumë të tjerë që qyteti që ka humbur pafajësinë e tij, të gjejë sa më shpejt Jayme.