Është shtyrë seanca nga Gjykata për Krime të Rënda për paraqitjen e konkluzioneve të palës mbrojtëse të bandës Shullazi, pasi nuk ishin të përgatitur. Seanca e radhës u caktua në datën 23 tetor. Në seancën e kaluar prokuroria kërkoi në total 64 vite burg për të akuzuarit. Për Emiljano Shullazin, i cili është cilësuar si kreu i grupit të strukturuar kriminal, prokuroria kërkon 17 vjet burg, 10 vjet për Blerim Shullazin, 15 vjet burg për Gilmando Danin dhe nga 11 vjet burg për Endrit Qyqjen dhe Endrit Zelën.
Prokurorë të çështjes ishin drejtuesja e Prokurorisë së Krimeve të Rënda, Donika Prela, Besnik Muçi, Anton Martini dhe Gent Osmani. Ajo u zhvillua nën masa të forta sigurie.