Në ditët e sotme është shumë më e lehtë të humbësh kilogramët e tepërt, por jo të gjithë i dinë pasojat e rënda që vijnë pas kësaj. Shumë persona preferojnë të zgjedhin rrugën e shkurtër, duke ndjekur dieta ekstreme të cilat të dobësojnë brenda pak javësh, apo duke u ushtruar më shumë seç duhet në palestër. Mjekët nuk e rekomandojnë një stil jetese të tillë, ndaj ka shumë mënyra të tjera të shëndetshme që mund të ndihmojnë në humbjen e kilogramëve të tepërt. Një prej tyre ka vendosur ta ndajë me të gjithë stilistja e njohur shqiptare, Stela Sallaku. Ajo ka publikuar në ‘Instagram’ një foto të saj dhe zbuloi se ka humbur 8 kilogramë për 9 muaj. Stela ka treguar se duke u kujdesur për mënyrën e të ushqyerit dhe duke ecur shumë në këmbë arriti të dobësohej. “Më në fund pas 9 muajsh kam humbur 8 kilogramë. U dobësova që të vishja prapë xhinset e preferuara. Pa palestër, pa dieta të frikshme, vetëm ecje rreth 10.000 hapa në ditë, shumë ujë, ëmbëlsira një herë në javë dhe jeshilllëqe pafund. Ua rekomandoj”, ka shkruar Stela.

Ky është një shembull i mirë për të treguar se askush nuk mund të bjerë nga pesha brenda një kohe të shkurtër dhe përpara se të ndiqni një dietë ekstreme duhet të njihni mirë metabolizmin tuaj. Mjafton të kombinoni në mënyrën e duhur dietën ushqimore me aktivitetin fizik dhe do të arrini të merrni rezultatet që dëshironi.