Bëhet fjalë për qytetet e Vlorës, Fierit, Durrësit, Beratit, Tiranës, Lezhës dhe Dibrës, në të cilën janë angazhuar operacione për shuarjen e zjarreve. Është dashur ndërhyrja e 75 zjarrfikësve me 13 automjete, 60 forca ushtarake si dhe helikopterë për të ndërhyrë dhe normalizuar situatën. Situata po mbahet nën kontroll nga Specialistët e Emergjencave Civile, të cilët po monitorojnë në mënyrë të vazhdueshme vendin nga rreziku i zjarreve për shkak të temperaturave të larta. Gjithashtu u është bërë thirrje e përsëritur qytetarëve që në rast konstatimi të zjarreve, të njoftojnë menjëherë autoritetet. Ja rastet e mbledhura nga lapsi.al:

QARKU BERAT
Në malin “Partizani”, në pjesën jugore të kurorës së qytetit Berat, u riaktivizuan disa vatra zjarri të cilat u përhapën me shpejtësi nga era e fortë. Zjarret kanë përfshirë një sipërfaqe të konsiderueshme dhe për këtë është ndërhyrë nga ajri me anë të helikopterit. Si pasojë e zjarrit është djegur një sipërfaqe rreth 40 ha me shkurre.

QARKU VLORË
Zjarri i nisur para tre ditësh në malin Mile, Konispol ka vazhduar edhe gjatë natës por me një intensitet më të ulët. Zjarri është shuar vetëm në orët e para të mëngjesit.

QARKU TIRANË
Në fshatin Pezë Helmes, Tiranë, ka rënë zjarr në një sipërfaqe me shkurre dhe shkozë. Zjarrfikëset e Tiranës kanë shkuar në vendngjarje duke punuar me mjete rrethanore për shkak të terrenit. Në ndihmë të zjarrfikësve kanë shkuar edhe 30 forca të ushtrisë dhe një helikopter që kanë shuar të gjitha vatrat. Si pasojë e zjarrit është djegur një sipërfaqe rreth 2 ha me shkurre dhe shkozë.

QARKU DIBËR
Vatra e zjarrit në vendin e quajtur “Liqeni i Zi”, Bulqizë, ka vijuar edhe gjatë natës. Zjarrfikëset e kanë pasur të pamundur për të vepruar për shkak të terrenit të thyer malor. Situata gjatë ditës së djeshme është monitoruar nga forca të shërbimit pyjor. Si pasojë e zjarrit është djegur një sipërfaqe e madhe me shkurre dhe pisha.

QARKU LEZHË
Zjarri i rënë në  fshatin Nënshejt, Mirditë është shuar plotësisht. Flakët kanë rrezikuar disa zona të banuara, por pas ndërhyrjes së zjarrfikësve të cilët kanë punuar me mjete rrethanore, zjarri është shuar. Si pasojë e zjarrit u dogj një sipërfaqe rreth 15 ha me shkurre dhe pisha. 

QARKU KUKËS
Në fshatin Dragobi, Tropojë, ka rënë zjarr në një sipërfaqe me shkurre dhe pisha në parkun natyror të Valbonës. Zjarrfikëset e kanë pasur të pamundur për të shkuar në vendngjarje për shkak të terrenit të thyer malor. Nga informacioni i marrë sipërfaqja e djegur është 2 ha. Vatrat e zjarrit kanë qenë larg nga zona e banuar.

QARKU FIER
Në fshatin Çerven, Fier, ka rënë zjarr në një sipërfaqe me shkurre dhe ullishte. Si pasojë e zjarrit u dogj një sipërfaqe rreth 5 dynym me shkurre dhe 40 rrënjë ulliri.

QARKU DURRËS
Në fshatin Likmetaj, Durrës, ka rënë zjarr në një sipërfaqe me shkurre dhe pisha. Si pasojë e zjarrit u dogj një sipërfaqe rreth 6 dynym me shkurre dhe pisha.

QARKU SHKODËR
Në fshatin Gruemirë, Malësi e Madhe, ka rënë zjarr në një sipërfaqe me bimë medicinale. Pas ndërhyrjes së zjarrfikësve flakët janë shuar. Si pasojë e zjarrit është djegur një sipërfaqe rreth 1 ha me bimë medicinale, sherebel.