Skandal në Eurovizion: EBU heton jurinë ruse!

Publikuar më: 14:59 10-05-2016

Sot ngre siparin festivali më prestigjoz i këngës në Europë me gjysëm-finalen që do të transmetohet duke filluar nga ora 21:00, dhe duket se ka qenë gjithçka përveç një fillimi të mbarë.

Në fakt Eurovizioni çelet sot zyrtarisht, por në të vërtetë ka filluar që dje. Në këtë spektakël konkurrimi fatet e artistëve, këngëve dhe performancave varen nga një kombinim votash mes publikut dhe jurive respektive të shteteve. Si në dy gjysëmfinalet e deri në natën e madhe, votat e publikut si dhe të jurisë kanë vlerën respektive të 50%. E ndërsa publiku do të mund të votojë vetëm live, juria i përcakton votat e saj një natë më parë, natë në të cilën sheh gjithë performancën, së bashku me efektet skenike dhe gjithçka tjetër ashtu siç do të jetë në natën e transmetimit live. E gjitha kjo supozohet të mbetet e fshehtë dhe konfidenciale, por nuk ka ndodhur kështu.

Një anëtare e jurisë ruse ka transmetuar live në Periscope (një aplikacion shumë i përdorur ku mund të transmetosh dhe të shohësh live persona të ndryshëm nga gjithë bota) votimin e saj si dhe performancën e Hollandës dhe Armenisë, duke treguar efekte speciale dhe punën me kamerat e cila nuk duhet t’i shfaqet publikut deri në natën live. Shtuar këtyre edhe procesin e gjykimit si dhe komentet nga juria.

EBU (European Broadcasting Union), e cila është producentja e Eurovizionit, pas hetimit të bërë në lidhje me këtë skandal dhe duke u konsultuar me televizionin publik shtetëror Rus, arritën në një përfundim të përbashkët duke e shpallur të pavlefshëm votimit e anëtares së jurisë ruse dhe duke e larguar atë nga juria. Televizioni Rus do të ketë mundësinë të përcaktojë një anëtar të ri të jurisë për finalen e madhe, të shtunën me 14 maj.

Për sa i përket përfaqësimit të Shqipërisë nga Eneda Tarifa, do të na duhet të presim edhe pak, pasi artistja bukuroshe është listuar për të performuar në gjysëm-finalen e dytë, e cila do të transmetohet të enjten më 12 maj. Kjo me shpresën për t’u ngjitur sërish në skenën e madhe europiane për natën e madhe 14 majit, në finalen e Eurovision Song Contest 2016.