Ministri i Drejtësisë Gazment Bardhi ka publikuar disa fakte tronditëse. Sipas tij mungojnë 300 byzylykë për mbikëqyrje elektronike të cilat kapin vlerën e rreth 2 milionë euro. Ministri deklaron se ky institucion i ka paguar paratë për këto pajisje të cilat mungojnë. Përmes një shkrese që mban datën 1 gusht, ministri u drejtohet kompanive që kanë fituar tenderin t’i kthejnë byzylykët, të cilët duket se kanë shëtitur mes disa zyrave, të paktën shkresërisht, pasi ekzistenca e tyre fizike ngelet e paprovuar. Nga shkresa e ministrit kuptohet se Ministria e Drejtësisë ka marrë në muajin mars të këtij viti në shërbim këto byzylykë me kartë SIM dhe ja kaluar Drejtorisë së Përgjithshme të Shërbimit të Provës, institucion i cili duhet t’i përdorte. Pikërisht në këtë pikë, fillon mjegulla e kësaj ngjarjeje të paprecedentë dhe me kosto të lartë për shtetin. Ndërkohë, në datën 11 prill të këtij viti, Shërbimi i Provës nëpërmjet një akti dorëzimi me numër protokolli 834, i ka dërguar 300 byzylykët elektronikë sërish bashkimit të operatorëve. Nga ana tjetër, këto të fundit, kërkesës së ministrit Bardhi për t’i kthyer mbrapsht byzylykët i janë përgjigjur se kontrata për shitjen e tyre është zbatuar njëherë dhe se Ministria e Drejtësisë i ka marrë në dorëzim. Gjithashtu se kërkesa e Bardhit është abuzive për të vënë nën presion bashkimin e operatorëve për qëllime korruptive. Por pavarësisht kësaj korrespondence, ministri Bardhi konstaton se institucionit që drejton i mungojnë 300 byzylykë, me një vlerë prej 2 milionë eurosh dhe se dokumentacioni tregon se këto pajisje po administrohen në mënyrë të paligjshme nga bashkimi i operatorëve dhe jo nga Ministria e Drejtësisë që i ka blerë. Për këtë arsye, Bardhi ka paralajmëruar se në rast të mos kthimit të 300 byzylykëve, çështja do t’i referohet Prokurorisë.