Ka shkuar në gjashtë numri i viktimave në Xhaminë Quebec City të Kanadasë ku dy persona qëlluan me armë në drejtim të tyre gjatë kohës që ata po kryenin ritualin e darkës.

Persona të armatosur sulmuan një xhami në Quebec të Kanadasë duke vrarë gjashte veta dhe plagosur tetë të tjerë.

Një zëdhënëse e policisë tha se dy veta janë arrestuar por nuk ka dhënë më shumë hollësi rreth identitetit apo motiveve të tyre.

Kryetari i Qendrës Kulturore Islamike në Quebec, tha se njerëzit ishin mbledhur për lutjet e mbrëmjes në kohën kur ndodhi sulmi. Sipas policisë aty ishin 53 veta.

Kryeministri kanadez, Justin Trudeau, e dënoi ngjarjen si "sulm terrorist mbi myslimanët", duke nënvizuar se vendi i tij vlerëson diversitetin dhe tolerancën fetare.

"Myslimanët kanadez janë pjesë e rëndësishme e strukturës sonë kombëtare dhe aktet e tilla të pakuptimta nuk kanë vend në komunitetet tona, qytetet dhe vendin tonë", tha kryeministri Trudeau.

Në qershor të vitit 2016 një kokë derri ishte lënë në dyert e të njëjtës xhami.

Pas sulmit të së shtunës, kryetari i New Yorkut, Bill De Blasio, tha se departamenti i tij i policisë po ofron masa të shtuara mbrojtëse për xhamitë në qytet.

"Bashkëqytetarët e mi njujorkez që janë myslimanë: qyteti i New Yorkut do t'ju mbrojë. Departamenti i Policisë së New Yorkut do t'ju mbrojë. Në do të luftojmë urrejtjen dhe paragjykimet", shkroi ai në twitter.