Nënkryetari i grupit parlamentar të Partisë Socialiste, Taulant Balla thotë se Partia Demokratike nuk e ka dënuar incidentin e rëndë sipas tij të armëmbajtjes pa leje  nga ana e deputetit Gent Strazimiri. Deputeti demokrat u fotografua me pistoletë në brez gjatë përplasjeve me policinë për parkun e lojrave në Liqenin Artificial të Tiranës

Sipas Taulant Ballës, Strazimiri nuk ka shkelur vetëm ligjin e armëmbajtjes pa leje, por edhe të shumëpërfolurin dekriminalizim.

Balla: “Duke i konsideruar veprimet e deritanishme të Policisë së Shtetit si tepër korrekte, kërkojmë që sipas ligjit shtetasi G.S. të procedohet penalisht në kushtet e flagrancës të armëmbajtjes pa leje. Kujtoj që kjo vepër penale është një vepër e përfshirë në Ligjin për Dekriminalizimin. Është rasti që PD të dëshmojë me vepra dhe jo me fjalë respektin ndaj ligjit. Gjithashtu dënoj edhe dhunën e deputetëve dhe përfaqësuesve të tjerë të PD ndaj punonjësve të Policisë së Shtetit dhe të Policisë Bashkiake të Tiranës”