Ndoshta jeni munduar ta dekoroni dhomën tuaj të gjumit me qirinj me shpresën se do të flini më qetë dhe do të largoni stresin.

Por mesa duket çelësi për arritjen e qetësisë fshihet tek skema e ngjyrave.

Në fakt  është vërtetuar se ngjyrat e ndryshme kanë impakt të ndryshëm në trurin e njeriut.

Thuhet se e kuqja sjell oreksin dhe njihet si ngjyra e kuzhinës. E gjelbra ka një efekt qetësues dhe dominon dhomat e ndenjes.

Po dhoma e gjumit? Blu, e kaltër nuk ka rëndësi, mjafton të luani me nuancat e blusë.

Ky nuk është supozim, e thotë shkenca.

Një studimi i Travelodge doli në përfundimin se e kaltra mund të ketë një ndikim real në cilësinë e gjumit.

Studiuesit panë se nga mijëra të anketuar, njerëzit që flinin në dhoma të lyera me nuancat e blusë ishin më të qetë në përgjithësi, në krahasim me ata që flinin në një dhomë të lyer me nuancat e ngjyrave të tokës.

Efekti qetësues i blusë, shprehet një nga specialistët lidhet me receptorët e specializuar të quajtur qeliza ganglion në pjesën e retinës së syve tanë, të cilët janë më të ndjeshëm ndaj ngjyrës blu.

Në anketimin e realizuar tek shtëpitë e britanikëve u pa se ata që flinin në dhoma ku dominonte bluja pushonin më mirë dhe zgjoheshin më  të lumtur dhe më pozitivë.

Mendohet se kjo ngjyrë mund të ngadalësojë ritmin e zemrës dhe madje të ulë presionin e gjakut.

Sipas studimit është mirë të shmangni ngjyrën vjollcë, e cila është shumë stimuluese dhe mund të ulë orët e gjumit në më pak se gjashtë.

Ngjyra kafe dhe grija konsiderohen se sjellin zymtësi dhe dëshpërim.