Një projekt-ide që ruan godinën ekzistuese të Teatrit Kombëtar dhe i shton asaj hapësira të reja funksionale, salla e ambiente për artistët e administratën, u prezantua dje në sallën e provave të TK-së, gjatë takimit të radhës së Aleancës Qytetare për Mbrojtjen e Teatrit Kombëtar.

Ndërsa deri më sot janë hedhur vetëm fjalë, dje, artistët, të shtuar në numër, jo nga radhët e tyre, por nga qytetarë të thjeshtë, shoqëria civile, arkitektë, inxhinierë e figura publike, etj., prezantuan një ide, se si mund të jetë teatri i ri, duke mos i mohuar qytetit, një ndërtesë historike, por as infrastrukturën që meriton një Teatër Kombëtar raporton Panorama.al

Projekti u ofrua falas nga pedagogu dhe arkitekti i njohur Vladimir Bregu, projektues i Pallatit të Kongreseve dhe bashkautor i Piramidës, në bashkëpunim me dy ish-studentë të tij, Ejona Belegu dhe Drilon Zajmi. Sipas arkitektit, ky projekt, së bashku me rikonstruksionin, mund të kushtojë 10 milionë euro, ndërkohë që projekti i propozuar nga Kryeministri, kushton tri herë më shumë.