Lulzim Basha, kreu i Partisë Demokratike ka reaguar për situatën e tensionuar në Bashkinë e Devollit.

Që në orët e para të mëngjesit mbështetësit e opozitës u grumbulluan para bashkisë Devoll në mbështetje të ish kreut të saj, Bledion Nallbati, i cili mbërriti në bashki, bashkë me administratën.

Por aty gjeti godinën të rrethuar nga forcat e policisë dhe forcat speciale brenda dhe jashtë ndërtesës.

Basha përmes një postimi në Facebook shkruan se pushteti i paligjshëm i 6% po uzurpon me dhunë qeverisjen lokale kundër vullnetit të popullit. Sipas tij, ky regjim kriminal e plaçkitës po hyn në rrugën e verbër të përplasjes me popullin e tij.

“Pushteti i paligjshëm i 6% po uzurpon me dhunë qeverisjen lokale, kundër vullnetit të popullit. Ky regjim kriminal dhe plaçkitës po hyn në rrugën e verbër të përplasjes me popullin e tij. Sot hajdutët në pushtet ndjehen të mbrojtur se kanë polici speciale, gaz lotsjellës dhe mercenarë, por nesër do të kenë fatin që meritojnë hajdutët dhe banditët!”, shkruan Basha.