Futbolli në Itali tronditet sërish. Në një operacion në shkallë të gjerë “Jashtë Loje”, Guardia di Finanza ka bërë disa kontrolle.

Të përfshirë janë 64 persona mes të cilëve administratori i deleguar i Milanit Adriano Galliani, presidenti i Napolit Aurelio De Laurentis, presidenti i Lazios Claudio Lotito, Jean Claude Blanc në cilësinë e ish- presidentit dhe administratorit të Juventusit, futbollisti Ezequiel Lavezzi, ish- futbollisti Hernan Crespo si dhe menaxheri i futbollit Alessandro Moggi, djali i ish – menaxherit të Juventusit, Luciano Moggi.

Në listën e Guardia di Finanza janë edhe presidentë, ish- presidentë dhe zyrtarë të lartë të klubeve Genoa, Sampdoria, Cesena, Brescia, Reggina, Parma, Livorno, Palermo.

Guardia di Finanza po kryen kontrolle dhe sekuestrime në disa skuadra të serisë A dhe B.

Akuza për të gjithë është evazion fiskal dhe falsifikim faturimesh.

Guardia di Finanza e ka nisur hetimin në viti 2012 në selinë e klubit të Napolit dhe të Federatës Italiane të Futbollit nisur nga tranferta e futbollistit Ezequel Lavezzi nga Napoli tek PSG.

Hetuesit flasin për një fenomen që ka marrë përmasa të mëdha në futbollin italian.

Kështu në analizën e tyre do të përfshihet mënyra e menaxhimit financiar të klubeve. Marrdhëniet kontraktuale menaxher-futbollist, transfertat e futbollistëve, kontratat e tyre dhe përfshirja në bilancet e klubeve, shitblerjet, rinovimet e kontratave si dhe përfitimet nga shitja e së drejtës së imaxhit e të drejtave televizive.