Presidenti i Kosovës Hashim Thaçi i sheh planet për një shkëmbim territorial me Serbinë si mënyrën më e mirë për të nxitur pranimin në BE dhe NATO. "Marrëveshja do të krijojë më shumë stabilitet dhe paqe në rajon dhe për Kosovën kjo do të mundësojë hyrjen në BE dhe NATO, si dhe Serbi," tha Thaçi të shtunën në një intervistë me APA në Vienë.  Vet Thaçi rikonfirmoi atë çka kishte deklaruar për Agjencinë e Lajmeve të Austrisë "APA“.  “Kam biseduar për zhvillimet politike në Kosovë dhe rajon. Duke folur për fazën e fundit të dialogut për normalizimin e marrëdhënieve ndërmjet Kosovës dhe Serbisë, kam theksuar se një marrëveshje mes nesh do të krijonte më shumë stabilitet dhe paqe në rajon. Për Kosovën dhe Serbinë kjo do të mundësojë anëtarësimin në BE, derisa për Kosovën edhe në NATO”-shkruan Thaçi në facebook ndërsa pohon se sheh si zgjidhje shkëmbimin e territoreve. “Nuk do të ketë kufij monoetnik dhe të dyja shtetet do të jenë shumetnike. Arritja e një marrëveshjeje ligjërisht obliguese, nënkupton që nuk do të ketë më kurrë luftë ndërmjet dy shteteve. Qytetarët do të kenë një jetë më të mirë, sepse nga jetësimi i marrëveshjes do të përmirësohet edhe gjendja ekonomike dhe do të krijohen më shumë vende të punës, derisa kufijtë do të largohen, duke u bazuar në modelin evropian”-deklaron kreu i shtetit të Kosovës. Ai thotë se shansi për të arritur një marrëveshje të tillë asnjëherë nuk ka qenë më i mirë, sepse vendi ka mbështetjen e BE-së dhe SHBA-së.

“Risia është që edhe Rusia do të jetë në gjendje të pranojë marrëveshjen, nëse të dyja palët pajtohen. Prandaj, është me rëndësi që të shfrytëzohet ky moment për të arritur një marrëveshje të balancuar, e cila merr parasysh interesat e dy vendeve. Në të kaluarën nuk ka pasur një gatishmëri të tillë”-këmbëngul Thaçiç.  “Nëse ne nuk e shfrytëzojmë këtë shans, atëherë qytetarët tanë do të na mallkojnë në dekadat e ardhshme. Kjo marrëveshje nuk ka të bëjë vetëm me korrigjimin e kufijve, por edhe me aspekte të tjera”-thotë me bindje Thaçi. Sipas tij kjo do të jetë një marrëveshje  gjithëpërfshirëse, e cila trajton edhe çështje të tjera, si çështjen e personave të zhdukur nga lufta e fundit, të cilët edhe më tutje nuk janë kthyer në vendlindje. Marrëveshja ka për qëllim të zgjidhë përfundimisht problemet dhe të mos jetë një zgjidhje e përkohshme.  Kreu i shtetit të Kosovës siguron se nuk do të ketë as “Shqipëri të madhe”, as “Kosovë të madhe”. “Në vend të kësaj, ne synojmë integrimin e rajonit në Evropën e bashkuar. Në këtë intervistë kam folur edhe për ushtrinë e Kosovës. Ky ishte një vendim i duhur i një shteti sovran, i bazuar në vullnetin e popullit të Kosovës”-shkruan presidenti i Kosovës.