“The Show Must Go On: The Queen + Adam Lambert Story” është dokumentari mbi grupin britanik i prodhuar nga “ABC”, ku janë përfshirë edhe intervista të rralla dhe të papublikuara më parë të anëtarëve të “Queen”, para dhe pas vdekjes së Freddie Mercury.

Gjatë një interviste në Gjermani, pyetjes së çfarë mendonte për vdekjen, solisti i ndjerë iu përgjigj: “Nuk kam menduar asnjëherë gjëra të tipit “Kur të vdes, a do të kujtohen për mua? Punë për ta.

Kujt i intereson? Do të kem vdekur. Dhe jo, nuk do të shkoj në parajsë. Ferri është më mirë. Imagjinoni se sa njerëz interesantë do të takoj”.

Në dokumentar do të shfaqen edhe mendimet e anëtarëve të grupit pas vdekjes së liderit.

“Freddie më mungon jashtëzakonisht shumë”, -thotë Brian May. “E dija që do të ikte shpejt, por gjithsesi mbetet ende një dhembje e madhe.

E kishim diskutuar që pasi ai të ndahej nga jeta mos të vazhdonim më dhe ndaluam për një periudhë të gjatë kohe.

Nuk kishim dëshirë të vazhdonim pa të. Nuk donim të ishim më “Queen”. Por, më pas u shfaq Adam Lambert dhe tani duam vetëm të jemi vetvetja”.