Faktet e publikuara për trukimin e ndeshjeve të tenisit ishte vetëm vala e parë e një tërmeti që pritet të trondisë nga themelet këtë sport. Pasi u bë e ditur se 16 tenistë të 50 vendeve të para në renditjen botërore janë të përfshirë në bastet e paligjshme, një tjetër detaj i rëndësishëm thellon skandalin.

Një nga tenistët e inkriminuar ka fituar titullin kampion, në një prej turneve Grand Slam. Emri nuk bëhet i ditur, pasi sipas gazetarëve të BBC dhe “Buzzfeed”, që zbuluan gjithçka, pas një investigimi të gjatë, mungojnë faktet e pakundërshtueshme. I dyshuari është një mes kampionëve më të mëdhenj të dekadës së fundit.

Shoqata e Tenisit Profesionist akuzohet se ka mbuluar dyshimet, duke mos vepruar ndaj sinjalizimeve mbi kuotat jo normale të basteve dhe sjelljes të pazakontë të protagonistëve në fushën e lojës. Kjo konfirmohet edhe nga masat e marra deri tani nga Task Forca kundër korrupsionit, e cila që nga krijimi ka dënuar vetëm pesë lojtarë dhe një arbitër, të gjithë sipas mediave ndërkombëtare “peshq të vegjël”.