Tek zona e Trenit pranë burgut në Tiranë një makinë ka përplasur një nënë me dy fëmijë binjakë teksa po ecnin në rrugë. Fillimisht nëna ishte në gjendje shumë të rëndë dhe pas disa orësh në spital ajo s’ja doli dot duke humbur jetën, kurse dy fëmijët për fat të mirë janë jashtë rrezikut. Ndërkohë është bërë publik dhe emri i viktimës. Ajo është Dhurata Prifti, e cila mësohet se është sportiste e njohur e klubit “Studenti”. Dhurata Prifti është e njohur dhe vetëm pak javë më parë zuri vendin e tretë në Kampionatin Shqiptar të Qitjes. Në 26 prill 2016 ajo mori medalje ne bronzit në disiplinën e qitjes me pushkë për femra.

Pas ngjarjes autori është larguar menjëherë ndërsa policia është vënë në ndjekje të tij. Sipas dëshmitarëve, që rrëfejnë tmerrin e asaj çfarë kanë parë, nëna 37 vjeç ka mbrojtur me trup fëmijët, duke i dalë para makinës dhe shpëtuar ata.

Uniformat blu po kqyrin kamerat e bashkisë së instaluar në disa kryqëzime në këtë zonë për të bërë të mundur gjetjen dhe arrestimin e drejtuesit që shkaktoi aksidentin e rëndë. Burime nga policia thonë se ai është larguar me shpejtësi të madhe dhe nuk përjashtojnë mundësinë që të ketë qenë nën efektin e alkoolit.