Adelina Ismajli është një nga këngëtaret më të njohura dhe më të dashura nga publiku shqiptar, e cila bëri bujë sidomos në vitet ’90. Por nga viti 2012, Adelina u shkëput nga muzika. Së fundmi, ajo ka qenë e ftuar në emisionin “N’drrimi i natës”, prej nga ku ka treguar se nuk mundi t’i kthehej skenës kur sytë e nënës nuk e shihnin më. “Ka qenë një thyerje e madhe emocionale kur mami u nda nga jeta. Në atë moment e kam pasur plotësisht të pamundur të jem në skenë e mos t’i kemi dy sytë e mamit që më shohin. Nuk e pashë të arsyeshme të isha në skenë të këndoja”, u shpreh Adelina. Këngëtarja u rikthye në skenë vitin e kaluar dhe këtu ka ndikuar ardhja në jetë e fëmijës dhe ndryshimi i realitetit për të.