Kryetari i Bashkisë së Tiranës, Erion Veliaj ka përshëndetur punën e Inspektoriatit Kombëtar të Territorit për vijimin e lirimit hapësirë për ndërtimin e Unazës së Madhe në zonën e Shkozës.

Veliaj ka postuar një video të shkurtër nga momenti i punës për prishjen e ndërtimeve pa leje në gjurmën e Unazës, ndërsa ka theksuar se puna për zhvillimin e qytetit nuk do të ndalet.

Ai gjithashtu bën të ditur edhe një herë se projekti i Unazës së madhe do i jap zgjidhje trafikut, ndërsa për të gjithë ata që preken nga zhvillimi i tij dhe që i kanë ndërtimet me leje do të ketë shpronësim total, ndërsa për të tjerët trajtim nga programet sociale të Bashkisë Tiranës, përfshi edhe banesa sociale.

Përmes një postimi në rrjetin social facebook Veliaj ka falenderuar edhe ata qytetarë që kanë hapur dyert e banesave e bizneseve të tyre sot tek Unaza e Re për skuadrat e ARRSH dhe Bashkia Tiranë.

Postimi i plotë

Mirënjohje qytetarëve shembullorë që kanë hapur dyert e banesave e bizneseve të tyre sot tek Unaza e Re për skuadrat e ARRSH dhe Bashkia Tiranë - kjo është e vetmja mënyrë europiane që edhe projekti të bëhet, edhe shpronësimi të paguhet, por edhe ata në nevojë të ndihmohen.