Në rradhë të parë, këto rrjete janë lehtësisht të hack-ueshme, megjithatë rreziku më i madh është kur këto foto përdoren për shantazh. Në situata të tilla janë përfshirë shpesh edhe emra të njohur publik të huaj dhe shqiptarë.
Agjencia britanike që merret me studimin e ndjekjeve penale, Crown Prosecution Service, këto ditë ka bërë publike shifra që kanë të bëjnë pikërisht me këtë vepër penale.
Që prej muajit prill të këtij viti, në Angli janë regjistruar plot 206 raste të personave që shantazhojnë vajza dhe gra për dhënien e parave në këmbim të mospublikimit të fotove ose videove private që disponojnë.
Shifra të tilla ndoshta edhe më alarmante do të kishim edhe në Shqipëri, nëse të gjithë ata që kërcënohen në këtë mënyrë do të kishin “guximin” ti denonconin këta persona.
Pyetja që të vjen menjëherë ndërmend është pse duhet këto vajza të shpërndajnë materiale të tilla? A bëhen ato “bashkëpunëtore” në krim? Më kujtohet një shprehje që thotë “nëse luan me zjarrin, prit që të digjesh” dhe në rastin tonë do të ishte:
“Nëse shpërndan materiale të tilla, prit që një ditë të publikohen".
Publikuesi potencial mund të jetë ish-i juaj, ose një shokë i tij, por ka raste kur shoqet e “ngushta” zihen dhe duan të turpërojnë njëra tjetrën publikisht në rrjete sociale.
Ditët e sotme janë bërë trend faqet në Instagram që publikojnë foto të tilla. Përditë shoh emra vajzash që bëhën preh e njerëzve me intelekt zero. Dhe pastaj detyrohet të ç'aktivizojnë çdo lloj rrjeti social. Reagimi vjen gjithnjë “pas të vjelave”.
E kuptoj që shumë prej tyre mund të justifikohen me faktin se i dashuri i kërkon materiale të tilla. Kjo mund të jetë një mënyrë e mirë për të mbajtur ndezur marrëdhënien në distancë apo për shumë arsye të tjera. Por, mos jini kaq të sigurta për dashurinë e tij. Nëse ai ju detyron që ti dërgoni foto të tilla, nuk është i duhuri!
Trik: Të paktën dërgoni foto ku mos t’ju duket fytyra!