Ministria e Jashtme e Shqipërisë ka reaguar për humbjen e jetës së shtetasit shqiptar Pëllumb Marinkolaj në një rajon policie në Athinë të Greqisë.

MPJ shprehet se është duke e ndjekur hap pas hapi këtë ngjarje, ndërsa ka kërkuar nga autoritetet greke të kryejnë hetim të plotë dhe transparent. Në reagimin e MPJ-së thuhet se ekzistojnë pamjet filmike të ngjarjes dhe është urdhëruar kryerja e autopsisë mjeko-ligjore.

Gjithashtu, ministria shqiptare ka kërkuar të respektohet dhimbja e familjarëve të mos instumentalizohet politikisht kjo ngjarje.

Reagimi i plotë i Ministrisë së Jashtme:

Ministria e Punëve të Jashtme ka ndjekur hap pas hapi nëpërmjet të gjitha kanaleve zyrtare rastin tronditës të humbjes së jetës së shtetasit shqiptar Pëllumb Marnikolaj në një rajon policie të Athinës.

Duke u shprehur familjareve ngushëllimet më të ndjera për këtë humbje tragjike, dëshirojmë të informojmë opinionin publik se:

Ambasada e Republikës së Shqipërisë në Greqi ka kërkuar nga pala greke bashkëpunimin e menjëhershëm dhe maksimal të të gjitha organeve ligjzbatuese.

Nga kontaktet e deritanishme me autoritetet greke, bëhet e ditur se ekzistojnë pamjet filmike të ngjarjes, si dhe është urdhëruar kryerja e autopsisë mjeko-ligjore.

Ministria e Punëve të Jashtme do të vijojë të ndjekë me vëmendje të veçantë rastin dhe kërkon nga autoritetet greke kryerjen e një hetimi të plotë dhe transparent, në respekt të të drejtave të njeriut dhe standardeve ndërkombëtare.

Pala shqiptare mbetet në pritje të rezultateve paraprake të hetimit të nisur dhe bashkëpunimit të plotë të autoriteteve greke, duke rezervuar të gjitha të drejtat për trajtimin e mëtejshëm të rastit.

Ambasada jonë në Athinë do të ndjekë në vijimësi këtë çështje në çdo instancë dhe do të vijojë t'i gjendet pranë të afërmve të viktimës.

Deri në zbardhjen e plotë të situatës, MPJ fton të respektohet dhimbja e familjareve dhe të mos instrumentalizohet politikisht kjo ngjarje.