Nuk ka dyshime që këngëtaret shqiptare  Bebe Rexha, Rita Ora, Dua Lipa dhe Era Istrefi po pushtojnë tregun muzikor ndërkombëtar dhe njëkohësisht dhe duke promovuar vendin e tyre të lindjes.

E megjithatë kjo nuk do të thotë se herë pas here ato nuk ndihen të ofenduara nga shqiptarët, të paktën kështu ka tregguar Bebe Rexha ditën e sotme, ku ka vendosur që të reagojë përmes disa videove në Insta Story.

Ylli i muzikës botërore me origjinë shqiptare ka pohuar se komentet më të ndyra në postimet në llogarinë e saj në Instagram rezultojnë të jenë nga shqiptarët.

Tepër e ofenduar dhe e indinjuar, Bebe shpërndan një mesazh sensibilizimi në mënyrë që shqiptarët të reflektojnë, të përkrahin dhe të ndihen krenarë për njëri-tjetrin.

Ja si është shprehur ajo: “Unë e dua kulturën e vendit tim, u rrita si shqiptare dhe vërtet e dua, por ndonjëherë ndjej se shqiptarët nuk e ndihmojnë njëri-tjetrin. Në Instagram-in tim komentet më të ndyra rezultojnë të jenë gjithnjë nga shqiptarët. Kjo më bën shumë konfuze sepse… a nuk supozohet që ne t’i japim një dorë, të ngremë dhe të mbështesim njëri-tjetrin? Mendoj se duhet të tregojmë më shumë dashuri, të mbështesim njëri-tjetrin dhe të jemi krenarë. Nuk mund të them se të gjithë nuk ma shprehin mbështetjen e tyre sepse ka persona, fansa të mitë shqiptarë që më thonë që ndihen krenarë për mua, por thjesht është e vështirë që të shohësh se vetë njerëzit e tu të thonë gjëra jo të hijshme për ty. Unë jam personi numër një që përkrah njerëz nga vend im… Megjithatë shoh që ka persona që më mbështesin dhe përkrahin, kështu që, faleminderit.”