Policia ka arritur të zbardhë vrasjen e një 36-vjeçari nga Fieri që rezultonte i zhdukur që nga muaji qershor i vitit 2017. Viktima K.B 36 vjeç, banues në Fier, i cili ishte denoncuar në polici i humbur nga familjarët është vrarë nga shoku i tij. Policia ka vënë në pranga autorin e krimit, Albert Zekaj 32 vjeç,  banues në Kalldrun, Bashkia Koplik, Malësi e Madhe. Ky shtetas ka qenë shok me viktimën K.B., ku janë njohur para tre vjetësh në Belgjikë dhe më pas kanë qëndruar në shtëpi me qera në qytetin e Fierit. Më datë 22.06.2017 rreth orës 23:00 ky shtetas dyshohet se e ka vrarë ne sende te forta dhe trupin e ka hedhur në afërsi të fshatit Daullas. Policia thotë se 32-vjeçari Zekaj, tashmë i arrestuar, gjatë marrjes në pyetje pranoi autorësinë e vrasjes dhe hedhjen e kufomës në vendin ku u gjet. Familja e denoncoi si të humbur. Viktima ishte denoncuar në polici i humbur nga familjarët, por nga veprimet e kryera si dhe nga dyshimet e familjarëve, në muajin Janar 2018 Drejtoria Vendore e Policisë Fier ka nisur hetimet pasi dyshohej se ky shtetas mund të ishte vrarë ose rrëmbyer. Nga kryerja e veprimeve proceduriale u sekuestruan në cilësinë e provës materiale një batanije e cila kishte shërbyer për transportin e trupit, një çekiç me të cilin autori ka kryer krimin dhe mbetje të trupit të cilat u dërguan pranë Institutit të Mjekësisë Ligjore Tiranë, për ekzaminim të mëtejshëm. Materialet iu referuan Prokurorisë pranë Gjykatës së Shkallës së Parë Fier, për veprën penale “Vrasje me dashje“.