I arrestuari për “terrorizëm” Medat Hasani u prangos tre ditë para ndeshjes kualifikuese Shqipëri-Izrael bashkë me 3 persona të tjerë, me dyshimin se po përgatisnin një sulmit terrorist gjatë ndeshjes së futbollit në “Loro Boriçi”. Gjithashtu edhe ish-ushtari i ISIS-it në Siri, Denis Shmilli, i arrestuar për dhunë në familje dhe vepra të turpshme ndaj fëmijëve të tij, rezulton se është mik i  Medat Hasanti.

ABC News ka siguruar një kopje të listës së personave që kanë luftuar në Siri për disa muaj, ku me numrin rendor 81 është identifikuar shtetasi Denis Shmilli. Sipas kësaj liste, thuhet se Shmilli bashkë me Dritan Kosturin, i lindur në Cërrik dhe banues në Elbasan dhe ish-efektivin e forcave komando Medat Hasani kanë qëndruar për rreth 137 ditë në frontet e ndryshme në Siri. Në dosje thuhet se tre shtetasit shqiptarë, Shmilli, Kosturi dhe Hasani i arrestuar pak ditë më parë për terrorizëm, kanë udhëtuar së bashku nga Shqipëria në drejt të Turqisë me makinë të vogël. Ata kanë dal nga territori shqiptar më 28 Korrik 2013 drejt Greqisë, ku më pas mendohet se kanë udhëtuar në drejtim të Turqisë për të përfunduar në krah të organizatës terroristë Al-Nusra në Siri. Sipas verifikimit të sistemit TIMS rezulton se ata kanë hyrë në territorin shqiptar më 17 Dhjetor 2013, rreth 4 muaj e gjysmë pas daljes nga Shqipëria. Referuar këtij materiali, të përpiluar nga agjentët e antiterrorit, thuhet se ata kanë qëndruar në kampet e Sirisë për stërvitje dhe kanë marrë pjesë edhe në luftime kundër forcave të Bashar-Al-Asadit.

Sa i përket njohjes mes tyre, në dosje thuhet se ata frekuentonin të njejtën xhami, atë të Unazës së Re ku predikonte imami i vetëshpallur Genc Balla, tashmë i dënuar me 17 vite burg nga Gjykata e Krimeve të Rënda.

Pavarësisht këtyre detajeve të dosjes së antiterrorit, Denis Shmilli tashmë po hetohet për akuzën e dhunës në familje dhe veprave të turpshme, ndërkohë rezulton i dënuar për mbajtje pa leje të eksplozivëve. Ndërsa shoku i tij me të cilin ka qenë në Siri, ish-oficer i forcave komando Medat Hasani po hetohet për terrorizëm së bashku me tre të arrestuarit e tjerë, Bekim Protopapa, Xhezair Fishti dhe Ergys Faslija. Në mesin e personave të kthyer nga lufta në Siri, është edhe Ervin Duka, edhe ky tashmë i arrestuar një ditë para ndeshjes në banesën e tij për mbajtje pa leje të eksplozivëve dhe armës.